Балаҕан ыйын 14 күнүгэр сэрии бэтэрээнэ Семен Колтовской 100 сааһын туолла. Дьокуускай куоракка Кузьмин уулуссатыгар баар бэтэрээн олорор дьиэтигэр «Поём двором» аахсыйа-кэнсиэри ыыттылар.
Үбүлээри эҕэрдэлии ИДьМ миниистирин солбуйааччы Владимир Климов, Дьокуускай куорат дьаһалтатын социальнай көмүскэл управлениетын салайааччы Семен Матвеев, Гагаринскай уокурук управатын салайааччы Евгений Сидоренко, куорат Думатын дьокутаата Саргылана Васильева, бэтэрээннэр сэбиэттэрин бэрэссэдээтэлин солбуйааччы Клавдия Егорова, уо.д.а. кэллилэр.
— Дьокуускайга билигин 17 сэрии бэтэрээнэ олорор. Сэрии ыарахаттарын ааһан, үтүө суобастаахтык үлэлээн-хамсаан, оҕолору, сиэннэри улаатыннартаан, 100 сааска тиийии – киһиэхэ барытыгар бэриллибэт улахан дьол, — диэн Семен Матвеев эттэ.
Ил Дархан аатыттан бэриллэр “Үйэ саас” бэлиэни уонна 100 тыһыынча солкуобайдаах төлөбүрү Семен Иванович түннүгүнэн көрөн турдаҕына, сиэнэ Екатерина Белолюбская тутта.
Дьокуускай куорат баһылыгын аатыттан 50 тыһыынча солкуобайдаах сэртипикээти туттардылар.
Галина Кривошапко аатынан Судаарыстыбаннай филармония солиһа Дмитрий Никифоров-Келлер, ырыаһыт Владимир Сердюк уонна полиция лейтенана Анна Бегим ырыа бэлэхтээтилэр.
Сэбиэскэй-японскай сэрии кыттыылааҕа Семен Иванович Колтовской 1922 сыл балаҕан ыйын 14 күнүгэр Бүлүү улууһун Кыргыдай нэһилиэгэр төрөөбүтэ. 1944 сыллаахха Кыһыл Аармыйа кэккэтигэр ыҥырыллыбыта. Аҕа дойду сэриитин II истиэпэннээх уордьанынан, «За боевые заслуги», «За победу над Германией», «За победу над Японией», «За безупречную службу», «75 лет Победы» мэтээллэринэн наҕараадаламмыта.
Ангелина Васильева, “Саха сирэ” хаһыат, edersaas.ru
Хаартыска: yakutskcity.ru.