100 сааһын туолбут бэтэрээҥҥэ үбүлүөйдээх бэлиэни туттардылар

Бөлөххө киир:

Педагогическай үлэ бэтэрээнэ, РСФСР үөрэҕириитин туйгуна, “Учууталлар учууталлара”, СӨ үөрэҕирии систиэмэтин бочуоттаах бэтэрээнэ, тыыл бэтэрээнэ Матрена Семеновна Гоголева быйыл тохсунньуга 100 сааһын бэлиэтээбитэ.

Киниэхэ  бу күннэргэ “Саха АССР 100 сыла” диэн өрөспүүбүлүкэ үбүлүөйдээх Бочуоттаах бэлиэтин туттардылар. Бу Бочуоттаах бэлиэ дастабырыанньатыгар Ил Дархан Айсен Николаев илии баттыыр. Бэлиэни Уус Алдан улууһун баһылыга Алексей Федотов бэтэрээҥҥэ  дьиэтигэр баран туттарда. Алексей Васильевич Матрена Семеновнаны Автономия 100 сылынан уонна Кыайыы күнүнэн истиҥник эҕэрдэлээтэ.

Ытык киһибит олорбут олоҕо бүтүннүү үлэҕэ бэриниилээх буолууну, дьоҥҥо, төрөөбүт дойдуга тапталы, саха киһитин тулуурун, муударай, мындыр көрүүтүн кэрэһилиир, биһиэхэ барыбытыгар үтүө холобур буолар, — диэн кини бэлиэтээтэ.

Матрена Семеновна 1922 сыл тохсунньу 15 күнүгэр Бэрт Ууһун нэһилиэгэр төрөөбүтэ. Сэрии сылларыгар педагогическай училищеҕа үөрэммитэ, 1942 сыл атырдьах ыйыттан Хоро начаалынай оскуолатыгар учууталынан үлэтин саҕалаабыта. Кыһыл гвардеецтар оҕолоро сылдьар уһуйааннарыгар иитээччинэн, Танда, Мүрү оскуолаларыгар начаалынай кылаас учууталынан барыта 42 сыл үлэлээбитэ.

2002 сылтан Матрена Семеновна Слепцовтар педагогическай династияларын баһылыга буолар. Кини кэргэнин – Аҕа дойду сэриитин кыттыылааҕа Алексей Николаевичтыын 4 оҕону иитэн, атахтарыгар туруорбуттара. Икки оҕолоро, онтон сиэннэрэ учуутал идэтин талан, династияны салҕаабыттара. Онон Матрена Семеновна элбэх сиэн, хос сиэн, хос-хос сиэн дьоллоох эбэлэрэ буолар.

100 сааһын туолар үбүлүөйдээх күнүгэр киниэхэ «Уус Алдан улууһун Бочуоттаах олохтооҕо” ааты иҥэрбиттэрэ, “Үйэ саас” бэлиэни уонна бэрэсидьиэн Владимир Путин суругун үөрүүлээх быһыыга-майгыга туттарбыттара.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0