Бүгүн куораппыт киин болуоссатыгар аны сайын от ыйын 9-16 күннэригэр Үөһээ Бүлүүгэ ыытыллыахтаах спорт национальнай көрүҥнэригэр Манчаары үбүлүөйдээх ХХ оонньуутугар диэри 100 хонук хаалбытын бэлиэтиир тэрээһин ыытылынна.
Бырааһынньыктыы киэргэтиллибит болуоссат сүрүн түһүлгэтигэр Манчаары оонньуутун көрсө өрөспүүбүлүкэ спорка миниистирэ Георгий Балакшин, “Сахаада-спорт” ассоциация бэрэсидьиэнэ Александр Ким-Кимэн, 1977-1986 сс. Саха АССР спорка кэмитиэтин бэрэссэдээтэлинэн үлэлээбит Афанасий Алексеев уонна оонньууну тэрийэн ыытар Үөһээ Бүлүү улууһун бэрэстэбиитэлэ Семен Михалев бэйэлэрин эҕэрдэлэрин тиэртилэр.
Ол курдук, Семен Анатольевич Михалев: “Аны оруобуна 100 күнүнэн Үөһээ Бүлүүгэ Манчаары Баһылай аатынан ХХ үбүлүөйдээх спартакиада ыытыллыаҕа. Биһиги, олохтоохтор, бу күнү долгуйа кэтэһэбит. Маннык улахан тэрээһини Үөһээ Бүлүүгэ итэҕэйбиттэригэр махтанабыт! Манчаары спартакиадата ыытыллыыта улуус инники сайдыытыгар улахан олугунан буоларын саарбахтаабаппыт. Биһиги, Саха сирин Олимпиадатынан билиниллибит оонньууну үрдүк таһымнаахтык тэрийэн ыытыахпыт диэн эрэннэрэбит”, — диэтэ.
Дьэ, ол кэнниттэн Манчаары ХХ спартакиадата ыытыллара 100 хонук хаалбытынан, оонньууга диэри хас хонук баарын көрдөрөр анал чаһыны үөрүүлээхтик үлэлэтии долгутуулаах түгэнигэр, комментатор: “10, 9, 8, 7, 6, 5, 4, 3, 2, 1! Барда!”, — диэбитин кэннэ, кыырпах былыта суох күөх халлааҥҥа өҥнөөх шариктары көтүтэн, “Ураа!” хаһыы дуорайда.
Салгыы, Манчаары спартакиадатыгар киллэриллибит спорт көрүҥнэринэн федерациялар анал эмблемаларын билиһиннэрии буолла. Ол сиэринэн, хас биирдии федерация түһүлгэҕэ тахсан бэйэлэрин эмблемаларын билиһиннэрдилэр.
Үөрүүлээх тэрээһиҥҥэ анаан сахалыы оонньууларга күрэхтэһиилэр ыытылыннылар. Онуоха наартаны ойууга: Виктор Архипов, Диана Эверстова, Александра Лобашева, тутум эргииригэр: Егор Протопопов, Алексей Уваровскай, мас тардыһыыга: Сергей Сутаков, Женя Терентьев, остуол оонньууларыгар Рената Тимофеева кыайыылаахтарынан тахсан, өйдөбүнньүк бэлэхтэри туттулар. Оттон Кирилл Мордовской Р.М.Дмитриев аатынан Олимпийскай эрэл училищетын дириэктэрэ Алексей Филиппов илиититтэн “Кыайыыга дьулуурун иһин” диэн анал бирииһинэн наҕараадаланна.
Болуоссакка толору мустубут дьоҥҥо Манчаары спартакиадатыгар сыһыаннаах биктэриинэ тэриллибитигэр, Софья Степанова, Данил Пестряков сөптөөх эппиэттэри биэрэн, оонньуу үөрүүлээх аһыллыытыгар киирэр билиэттэри тутар дьолго тигистилэр.
Үөрүүлээх тэрээһин, 1968 сыллаахха Манчаары спартакиадатын аан бастаан бэлэмнээн уонна тэрийэн ыыппыт оччотооҕу “Урожай” спортивнай уопсастыба салайааччыта, 1977-1986 сс. Саха АССР спорка кэмитиэтин бэрэссэдээтэлинэн үлэлээбит Афанасий Егорович Алексеев таһаарыытыгар көхтөөх оһуохайынан түмүктэннэ.
Петр ПАВЛОВ, “Саха сирэ”, www.edersaas.ru
Ааптар хаартыскаҕа түһэриилэрэ.