«Кындыкан» айар түмсүү уонна СӨ Ыччат дьыалатыгар уонна социальнай коммуникацияларга министиэристибэ тэрийиилэринэн, Акртика күнүгэр, Былатыан Ойуунускай аатынан Саха академическай драматическай тыйаатырыгар «100 хартыына» аахсыйа ыытылынна.
—Саха сирин хотугу норуоттарын култуураларын дьоҥҥо-сэргэҕэ киэҥник билиһиннэрэргэ, харыстаан илдьэ сылдьан кэнчээри ыччакка тиэрдэн иһэргэ, тарҕатарга көмөлөһөр тэрээһиҥҥэ бу бэлиэ күн биһиги айар түмсүүбүт аахсыйаҕа үөрүүнэн кыттар. 100 хартыына мэдиссиинэ тэрилтэлэригэр бэриллиэ. Бу аахсыйанан өрөспүүбүлүкэ бүттүүнэ биһиги доруобуйабыт, чэгиэн буолуубут туһугар кыһамньыларын уурааччыларга махтал тылларын тиэрдэр уонна махтанар, — диэн бырайыак ааптара Маргарита Попова этэр. Тэрийээччилэр биэс художественнай пууну арыйар уонна 100 хартыынаны биэрэр былааннаахтар.
Үөрүүлээх тэрээһини арыйыыга «100 хартыына» куратора, аныгы концептуальнай айымньы худуоһунньуга Айна Куртц:
—Худуоһунньук айан таһаарааччы быһыытынан, өйдөбүлү биэриигэ улахан эппиэтинэһи сүгэр. Маныаха култуура уонна ускуустуба хартыынанан, музыканан, тыйаатырга көрдөрүүтүнэн көрөөччүнү дириҥник толкуйдуурга, анааран көрөргө ыҥырар. Аахсыйаҕа биһиги ускуустуба храмын, Саха тыйаатырын таллыбыт. Худуоһунньук иннин диэки дьулуһуохтаах, тапталынан айан -тутан уонна сырдыкка дьону ыҥыран иһиэхтээх, — диэтэ кини.
Үөрүүлээх тэрээһиҥҥэ «Эйээр» этно-бөлөх, Ян Попов, Сааскыйа Бугаева кытыннылар. Ыалдьыттар тыыннаах музыкаҕа уйдаран хартыына уруһуйдаатылар.
—«Кындыкан» айар түмсүү чаҕылхай ураты санаалары киллэрэр, көҕүлүүр. Маныаха биһиги «100 хартыына» аахсыйаҕа кыттыһарбытыттан үөрэбит. Бу Арктика култууратын харыстааһыҥҥа уонна сайыннарыыга биһиги эмиэ кыра кылааппытынан буолар. Манна даҕатан эттэххэ, Былатыан Ойуунускай аатынан Саха академическай драматическай тыйаатыр бу өрөбүллэргэ дьүкээгир драматура Геннадий Дьячков айымньытынан туруоруллубут «Саһарҕа хоптото» испэктээги көрдөрдө. Ити курдук биһиги көрөөччүлэрбитигэр уонна ыалдьыттарга хотугу норуоттар булугас, толкуйдаах өйдөрүн-санааларын, күүстэрин, сатабылларын, халбаҥнаабат кытаанах санаалаахтарын, тулуурдаахтарын, дьулуурдаахтарын тиэрдэргэ дьулуһабыт. Испэктээгинэн дьүкээгир тылыгар харыстабыллаах сыһыаны уонна тулалыыр эйгэ кыһалҕатын көтөҕөбүт, — диэтэ Саха тыйаатырын дириэктэрин солбуйааччы Геннадий Охлопков.
Аахсыйа саҕаланыытыгар 33 киһи кыттыыны ылла. Санатар буоллахха, бастакы хартыынаны Уһук Илин уокуругун дьахталларын пуорумун дэлэгээттэрэ аахсыйа волонтердарын уонна Дьокуускайдааҕы художественнай училище устудьуоннарын көрүүлэринэн уруһуйдаатылар.
—Биһиги бу үлэбит Ийэ сылыгар, ийэҕэ, тапталга, сүрэххэ сылааһы иҥэриигэ ананна. Ийэ таптала олохпутугар саамай сырдык, саамай истиҥ, саамай сылаас иэйии. Маннык бырайыактар Саха сирин норуоттарын түмэллэр. Мин «100 хартыына» бырайыакка кыттыбыппыттан үөрэбин, — диэн дуобакка аан дойду чөмпүйүөнэ Матрена Ноговицына эттэ.
Аахсыйаҕа анкета толорон кыттыахха эбэтэр: +7 (964)- 422- 68-07 эрийиэххэ сөп. Бырайыак куратора Айна Куртц.
Сиһилии: https://docs.google.com/document/d/1W_IiDSdtNlTjM29u__5CTfPbSfHlP-ipR2FAt2c3YR8/edit