От ыйын 8 күнэ — дьиэ кэргэн күнэ. Бу күн «Эрэллээх, үйэлээх таптал» диэн уопсастыбаннай наҕараада анал мэтээлэ 100 дьиэ кэргэҥҥэ туттарыллыаҕа.
Бу сылга маннык мэтээли 33 нэһилиэккэ уонна куорат уокуруктарын ыалларыгар биэриэхтэрэ. Мэтээллэри үөрүүлээх быһыыга-майгыга, биллэн турар, санитарнай-эпидимиологическэй балаһыанньаны тутуһан туран, 25 сылтан аҕыйаҕа суох бииргэ ыал буолан эйэлээх олоҕу олорбут, оҕолорун дьоһун дьон гына иитэн таһаарбыт ыал ылыаҕа.
Бу бэлиэ күнү төрүттээччинэн Москватааҕы култуурунай-социальнай пуонда буолар. Кинилэр сыл ахсын кубуотаны таһынан (кубуотаҕа 70 мэтээл) эбии 30 мэтээли Москватааҕы Гознакка сакаастаан оҥоттороллор.
Наҕараадалыыр нобуорга футляр иһигэр мэтээллээх, анал бэлиэлэр уонна дастабырыанньа киирэр. Мэтээл сирэйигэр Петр уонна Феврония диэн кэргэнниилэр мэтириэттэрэ ойууланар. Нөҥүө сирэйигэр бу күн символ уобараһа — хонууга үүнэр ромашка сибэкки ойууланар. Ромашкаҕа кыһыл уонна күөх өҥнөр дьүөрэлэһэллэр. Бу эр киһи уонна дьахтар саҕалааһынын туоһулууллар.
Ульяна Захарова, edersaas.ru