Кулун тутар 5 күнүттэн Саха АССР 100 сылыгар үөрэх эйгэтигэр анал бириэмийэни туттарыы куонкуруһугар сайаапкалары ылан саҕалаатылар. Куонкуруска биэс сылтан итэҕэһэ суох ыстаастаах сүрүн уопсай уонна эбии үөрэхтээһин бырагырааматынан үөрэтэр, ол иһигэр настаабынньык педагогтар кыттыахтарын сөп.
“Олох балысханнык сайдар, биһиги харахпыт далыгар саҥа көлүөнэ үүнэр. Бэҕэһээҥҥи үөрэнээччилэргэ уонна устудьуоннарга туһаммыт сатабылбытын, сыһыаммытын бүгүн туһанар табыллыбат. Хаачыстыбалаах үөрэх учууталлар, иитээччилэр идэлэрин таһымын үрдэтэргэ дьулуһууларыттан, үлэлэрин түмүгэр эппиэтинэстээхтик сыһыаннаһалларыттан тутулуктаах”, — диэн Ил Дархан Айсен Николаев бигэ эрэллээх.
Өрөспүүбүлүкэ сүүс бастыҥ учууталыгар анал бириэмийэни туттарыы куонкуруһа, эрэгийиэҥҥэ уопсастыба билиниитин ылбыт бастыҥ педагогтары көҕүлээһин, бэлиэтээһин каадыры үүннэриигэ уонна сайыннарыыга туһаайыллар.
Куонкурус түмүгүн сыаналааһыҥҥа педагог үөрэх аныгы технологиятын, тэйиччиттэн үөрэх ньымаларын көдьүүстээхтик туһаныыта, биирдиилээн үөрэтии бырагыраамаларын оҥоруута уонна туттуута, үөрэнээччилэрэ норуоттар икки ардыларынааҕы, дойду, өрөспүүбүлүкэ таһымнаах олимпиадаларга, куонкурустарга, бэстибээллэргэ үрдүк ситиһиилэри ылыылара учуоттаныаҕа.
Куонкурус түмүгэр Саха сирин 100 бастыҥ учууталыгар 100 тыһ. солкуобайдаах харчынан анал бириэмийэлэри туттарыахтара. Учууталлары харчынан наҕараадалыырга анаан “РНГ” АУо СӨ Үүнэр көлүөнэҕэ пуондатын нөҥүө 10 мөл. солк. кээмэйдээх үбү ыытыаҕа.
Куонкуруска кыттыыга сайаапкалары кулун тутар 11 күнүгэр диэри ылаллар. Куонкуруска киирбит матырыйааллары бэрэбиэркэлээһин кулун тутар 12 – муус устар 8 күннэригэр буолуоҕа. Онтон түмүгү 2022 сыл муус устар 14-24 күннэригэр таһаарыахтара.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыска: СИА.