Биир кэлим эксээмэҥҥэ 100 баалы ылбыт оҕолор 15-тии, кинилэр учууталлара 20-лии тыһыынча солкуобайы ылыахтара диэн Ил Дархан онлайн-көрсүһүү кэмигэр эттэ.
— Быйыл 29 үөрэнээччи 100 баалы ылла. Ол иһигэр, Нерюнгри куорат 1-кы №-дээх гимназиятын бүтэрбит Ангелина Шавейко биология, химия курдук уустук биридимиэттэргэ иккитэ 100-түү баалы ылан үөртэ. Бу сыралаах үлэ, билиигэ тардыһыы түмүгэ. Эһигинэн киэн туттабыт уонна элбэҕи эрэнэбит!
Быйыл информацияҕа уонна инфокоммуникационнай технологияларга эксээмэн түмүгүн долгуйа кэтэспиппит. Бу эксээмэн аан бастаан көмпүүтэргэ саҥа көрүҥүнэн ыытылынна. Манна 4 выпускник 100-түү баалы ылан үөртүлэр. Кинилэртэн биирдэстэрэ — В.Ларионов аатынан физическэй-тиэхиниичэскэй лиссиэйи бүтэрбит Максим Лаптев. Оҕолору уонна учууталлары дьоһун ситиһиилэринэн эҕэрдэлиибин! — диэн Ил Дархан бэйэтин “Инстаграмыгар” суруйда.
Ангелина Васильева, “Саха сирэ” хаһыат, edersaas.ru