100 000 солкуобай бэлэх – Өймөкөөн улууһун оскуолаларын үөрэнээччилэрин сэбиэттэригэр

Ааптар: 
Бөлөххө киир:

Саҥа үөрэх дьылыгар хас биирдии оскуола иһинэн үөрэнээччилэр бэйэлэрин салайынар уопсастыбаннай тэрилтэлэрэ сотору кэминэн үлэлэрин саҕалыахтара.

Ол курдук, оскуола саҥа бэрэсидьиэнэ талыллыаҕа, үөрэх, култуура уонна доруобуйа харыстабылын миниистирдэрэ ананан, оскуола уопсастыбаннай олоҕун сүрүннүөхтэрэ.

Дьиҥэр бу оонньуу курдук барар курдук эрээри,  үөрэнээччилэр сэбиэттэрэ олус дириҥ ис хоһоонноох, оҕолору олоххо эрдэттэн бэлэмнээх буоларга үөрэтэр. Сэбиэскэй кэмҥэ звеноттан саҕалаан, этэрээт, дружина бэрэссэдээтэллэрэ, эйгэлэринэн — үөрэх, спорт, култуура сектордара, быһата, оскуолаттан ыла тэрийэр үлэҕэ дьоҕурдаах оҕолор үгүс үлэни ыытан, олохторугар кэнэҕэс салай ааччыга тиийэ үүнэн тахсыбыт холобурдара – хардыы аайы.

Өймөкөөн улууһун баһылыга Иннокентий Сивцев “Томтор орто оскуолатыгар бэрэсидьиэнинэн үлэлии сылдьан, салайар үлэ олугар бастакы хардыыны оҥорбутум” диэн санаатын үллэстэр.

— Быйыл оскуола оҕолоро бэйэни салайар уопсастыбаннай сэбиэттэрин өйөөн, улуус дьаһалтатын уонна муниципальнай сэбиэт дьокутааттарын аатыттан  оройуон аҕыс оскуолатын иһинэн үлэлиир үөрэнээччилэр сэбиэттэригэр аадырыстаах 100 тыһыынча солкуобайдаах көмөнү оҥордубут. Бу харчыны оскуола үөрэнээччилэрин сэбиэттэрэ оскуола салалтатыгар симиэтэ оҥорон отчуоттаан, бэйэлэрэ туох үлэни ханна ыыталларынан тутталларыгар өйөбүл буолуоҕа. Онон оҕолорбутугар уопсастыбаннай үлэҕэ көхтөөхтүк кыттан, төрөөбүт нэһилиэктэригэр туһалаах дьыаланы оҥороллоругар баҕарабын, — диэн улуус баһылыга Иннокений Сивцев санаатын тиэртэ.

Ити курдук, оҕону өссө оскуола сааһыттан өйөөн, үтүө дьыаланы оҥорорго кынаттыыр сонун сүүрээни олоххо киллэрбит оройуон баһылыгын  дьоһуннаах бэлэҕэ атын улуустарга — бастыҥ холобур.

 Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0