СӨ үлэҕэ, социальнай сайдыыга министиэристибэтин үлэһиттэрэ элбэх оҕолоох дьиэ кэргэттэри Саҥа дьылынан эҕэрдэлииллэр. Ол курдук, миниистири бастакы солбуйааччы Иван Алексеев Дьокуускайга олорор Розалия, Дмитрий Белолюбскайдарга ыалдьыттаата, ийэлэригэр, оҕолорго бэлэх туттартаата.
Белолюбскайдар 10 оҕолоохтор, 3 сиэннээхтэр. Улахан оҕолоро 27, кыралара 9 саастаахтар. Оҕолорун үлэнэн иитэллэр. Даачаларыгар кыра хаһаайыстыбалаахтар, онно хас биирдиилэрэ туспа эбээһинэстээхтэр. 2018 сыллаахха социальнай хантыраак көмөтүнэн хаһаайыстыба тэринэр кыахтаммыттар.
Оҕолор бэрт чобуо дьон. Тугу сөбүлүүллэрин, тугунан дьарыктаналларын кэпсээтилэр. Спордунан дьарыктанар буолан, доруобуйаларын бөҕөргөтөллөр. Миниистири солбуйааччы кинилэргэ үчүгэй үөрэҕи, дьоллоох оҕо сааһы баҕарда. Ийэлэрэ Розалия Белолюбская үүнэр сыл Ийэ сылынан биллэриллибитин биһирии истибитин туһунан эттэ, махтанна.
Ангелина Васильева, “Саха сирэ” хаһыат, edersaas.ru