Идэлээх сойуустар сүрүннүүр сэбиэттэрин дааннайдарынан, Саха сиригэр 110 тыһыынчаттан тахса киһи бырааһынньыктааҕы хаамыыга, миитиннэргэ кытынна. Оттон Дьокуускай куоракка 55 тыһыынча киһи, 300-тэн тахса тэрилтэ, уопсастыбаннай түмсүү кыттыбыт. Саха сирин олохтоохторо өссө төгүл түмсүүлээхтэрин, биир сомоҕо буолалларын көрдөрдүлэр.
Өрөспүүбүлүкэ арҕааҥҥы өттүгэр төһө да былыттаах, ардаары-хаардаары турар, тымныы тыаллаах буоллар, дьон син биир халыҥнык таҥнан баран, параадка кытта кэллэ. Холобур, Сунтаарга хаамыыга, сэлэлээн хаамыыга тэрилтэлэр бары, тыһыынчанан киһи кытынна. Бу кэнниттэн киин болуоссакка кэнсиэр буолан, ырыа-тойук дьиэрэйдэ.
Нам улууһугар сааскылыы сандаархай, сылаас күн этэ. Интэриэһинэйэ диэн, улуус гербэтин кубатын биир кыыс муус-маҥан таҥаһы таҥнан баран, дьүһүйэн көрдөрбүт. Намнар быйыл сайын буолуохтаах Олоҥхо ыһыаҕар бэлэмнэнэр буолан, бу да сырыыга көхтөөхтүк кытыннылар.
Кэбээйигэ эмиэ үлэ кэлэктииптэрэ биир сомоҕо буолалларын көрдөрдүлэр. Соторутааҕыта 75 сылын бэлиэтээбит улуустааҕы “Дабаан” хаһыат кэлэктиибэ туох баар тэрээһиннэргэ көхтөөхтүк кыттар, бүгүн былаах, шарик туппутунан, баян тыаһынан доҕуһуоллатан, киин уулуссанан хаамтылар.
Киэҥ нэлэмэн Саха сирин бары улуустарыгар, нэһилиэктэригэр демонстрация кэнниттэн, араас тэрээһиннэр ыытылыннылар: үлэ дьонун чиэстээтилэр, үлэ кэлэктииптэрин эстафеталара, айар куонкурустар, бэстибээллэр, субуотунньуктар ыытылыннылар.
Ангелина Васильева, “Саха сирэ” хаһыат, edersaas.ru