Блогердар уонна урбаанньыттар ойуур баһаардарын утары үлэҕэ түмүстүлэр. Кинилэр аҕыйах күн иһигэр 1 мөлүйүөн солкуобайтан тахса сууманы хомуйан, баһаары умуруорууга наадалаах табаардары, бородууктаны атыылаһан, улуустарга ыыттылар.
Ол курдук, респиратордары, мааскалары, бэнсиин эрбиилэрин, мотопомпалары, лаппаахылары, сүгэлэри, канистралары, шлангтары, сыаптары, противогазтары, балааккалары, о.д.а. ылан ыыталлар. Урбаанньыттар, тэрилтэлэр («Строительнай» ырыынак, “Розтор”, «ТКД», «Стильный доктор», “Мир инструментов”, о.д.а.) бу аахсыйаҕа кыттыһан, наадалаах малы-салы босхо биэрэллэр, харчы ыыталлар, такси суоппардара босхо илдьэллэр. “Арт Кафе” итии аһылыгынан баһаары умуруорааччылары хааччыйда.
Блогердар Галя Виноград, Ольга Птицына, Василика Винокурова, Алена Ядреева, Мария Столярчик, Фелицата, Анна Ониегбари, Елена Аммосова, о.д.а. харчы хомуллуутун, көмөнү ыытыыны сүрүннүүллэр. Айыл Дьулур5ан, Петр Черкашин, Аскалонидзе курдук көхтөөх уолаттар этэрээт хомунан тиийэн, Горнай улууһугар уоту умуруорууга үлэлии сылдьаллар.
Баһаар сиэбит сирин уопсай иэнэ 1,5 гектаартан таҕыста, хойуу буруоттан сүүһүнэн тыһыынча киһи эмсэҕэлиир. Ардаҕы, үөһэттэн көмөнү эрэ кэтэһэн олорбокко, хас биирдиибит бу курдук тус кыаҕын иһинэн көмөлөстөҕүнэ, бары бүттүүн күүспүтүн түмтэхпитинэ, бу иэдээни тохтотуохпут.
Ангелина Васильева, “Саха сирэ” хаһыат, edersaas.ru