Киһи-киһи бары араас. Тулалыыр эйгэни, буолар быһыыны-майгыны, олох эриэнин-быраанын, дьылҕа эриирин-мускуурун бары араастык ылынабыт, сыаналыыбыт.
Үөһэттэн оннук ыйаахтаах, ураты айылгылаах буоллахпыт. Ол эрэн барытын чэпчэкитик ылынар, мөкүнү дириҥэппэт, олоҕу уустугурдубат дьон бааллар. Кинилэр ханнык да түгэҥҥэ санааны түһэрбэккэ, кими да буруйдаабакка атыттары үтүөҕэ сирдииллэр. Оннук майгылаахтары аныгылыы “позитивнай дьон” дииллэр. Биир отой позитивнай оҕонньору эдэр эрдэхпинэ көрбүппүн умнубаппын.
Илин эҥээр олохтоохторо сыллата Өлүөнэ эбэбит барахсан мууһа халҕаһалыы устан ааһарын олус кэтэһэбит. Оччоҕо сайыммыт дьиҥнээхтии кэлэр. Араас уу ааллара дьону, тырааныспары тиэнэн кытылтан кытылга төттөрү- таары усталлар. Ордук биһиги, мэҥэлэр, айаммыт- сырыыбыт дьэ сэргэхсийэр.
Урукку дьылларга чааһынай мотуорка эҥин сылдьыбат. «Максим Аммосов” уонна “Степан Аржаков” тырамбаайдар араспысаанньанан чаһы курдук тигинэччи дьону таһаллара. Мин устудьуоннуур кэммэр сайыҥҥы эксээмэннэри сороҕор Майаттан киирэн туттарарым. Эрдэ туттардахпына ол күн төттөрү дьиэлиирим.
Дьэ биирдэ өрүс пордугар Бэстээхтиир тырамбаайга киирээри анньыһан ахан турдубут. Эриэн тельняшка ырбаахылаах речник уолаттар буфет аһын-үөлүн таһа сырыттылар. Саастаах көлүөнэттэн тырамбаай буфетын өйдөөбөт киһи суох буолуо. Биир чаас устарбытыгар хайаан да буфекка уочараттаан аһаан тэйэр этибит. Онтон кэһии атыылаһабыт – куораттан тахсарга майаларга, Майаттан киирэргэ – куораттарга. Тырамбаайга киирээри кэтэһэн турар бөлөхпүтүгэр кырдьаҕас тыа оҕонньоро баара – орто уҥуохтаах, хатыҥыр, уһун сиэрэй плащтаах, киирсэбэй саппыкылаах. Куораттан таһааран иһэр табаарын сиэккэҕэ укта сылдьар – от күөх өҥнөөх матассыыкыл кааската уонна хортуон хоруопкалаах торт. Итинник песочнай торду ылаары Майаҕа да халыҥ уочарат буолара, дэриэбинэҕэ отой атыыламмата. Сиэттэригэр кэһии эбитэ дуу, ким эрэ төрөөбүт күнэ чугаһаабыта дуу. Оҕонньор бэртээхэй настарыанньалаах, сэргэх көрүҥнээх.
Ол турдахпытына арай … Ким алҕас анньыбыта дуу, эбэтэр бэйэтэ сыыһа үктээбитэ дуу, оҕонньорбут эмискэ ууга “күр” гынан хаалла! Кытыл уонна тырамбаай ыккардыгар кыараҕас ырбыы баарынан оҕонньор ууга мэлис гынна! Бары соһуйан, уолуйан:
— Оо! – дэстибит. Аймалҕан буолла! Маладьыастар, хата икки речник уол тута аллара ыстаннылар уонна өр гымматылар, ибили сытыйбыт оҕонньору уутун саккыраппытынан хостоон таһаардылар. Көрбүппүт, оҕонньор ырбаччы үөрбү – үт, илиитигэр сиэккэтин өрө тута сылдьар. Уонна:
— Хата, мантыкайбын олох ыыппатым ээ! – диир. Сиэккэттэн уу саккырыыр, били торда баҕас мэлийдэ буолуо дии санаатым. Тырамбаай үлэһиттэрэ тута оҕонньору үөһэ бэйэлэрин хосторугар илдьэ барбыттара. Кэлин кинини көрбөтөҕүм. Итинник соһуччу, кутталлаах түгэҥҥэ санаатын отой түһэрбэтэх, сүрдээх позитивнай киһи буолан биэрбитэ ол боростуой тыа оҕонньоро.
Айталыына Хоһуунаба