«Үлэлиир киһи тугу барытын кыайар!»: «Работай в Якутии» бэстибээл эдэр ыччаты түмэр

Эн саҥа саҕаланыыҥ мантан саҕаланар! От ыйын 16 күнүгэр Дьокуускай куорат «Үлэ кыбаартала» креативнай кластерыгар эдэрдэри, үлэ көрдөөччүлэри уонна үлэ биэрээччилэри түмэр «Работай в Якутии» диэн өрөспүүбүлүкэтээҕи карьера бэстибээлэ ыытыллыаҕа.

Бүгүҥҥү күҥҥэ Саха сирин эдэр ыччатын үлэ булунуута – сытыы боппуруостартан биирдэстэрэ. Ыччат каадырын киинин чинчийиитинэн, үөрэҕи бүтэрээччилэр 60-тан тахса бырыһыаннара бастакы үлэлэрин дойдуларыгар булунар баҕалаахтар. Ол эрэн, сорох ардыгар ханнык идэҕэ наадыйалларын, хайдах үлэҕэ киирэри ситэ билбэттэр. Бу бэстибээл – эдэр киһиэхэ карьератын саҕалыырыгар эрэллээх хардыыны оҥороругар көмөлөһөр соруктаах. Тэрээһини СӨ Бырабыыталыстыбата, СӨ Үлэҕэ уонна дьону социальнай көмүскээһиҥҥэ министиэристибэтэ, ону тэҥэ Ыччат каадырын киинэ тэрийэллэр.

Эйигин туох күүтэрий? Бэстибээлгэ кыттыы босхо. Бырагыраамата олус киэҥ уонна туһалаах:  Идэҕин тал, сатаан резюме суруй. Үлэ ырыынагын исписэлиистэрэ бүгүҥҥү күҥҥэ ханнык идэлэр наадалаахтарын кэпсиэхтэрэ, сүбэ-ама биэриэхтэрэ уонна үлэҕэ киирэргэ сүрүн докумуону – резюмены сатаан суруйарга үөрэтиэхтэрэ.

Ситиһиилээх дьону кытта алтыс. Өрөспүүбүлүкэ бөдөҥ хампаанньаларын салайааччыларын, биллэр урбаанньыттарын, бастыҥ исписэлиистэрин кытта аһаҕас кэпсэтиигэ кытын.

«Идэлэр кыбартааллара» квест-оонньуу. Араас идэлэри кытта билсэн, сорудахтары толорон, сыаналаах бириистэри сүүйүөххүн сөп.

«Битва за кадры» цифровой кэпсэтии. IT эйгэтин, цифровой технологиялары уонна кэлэр кэскиллээх идэлэри тула кэпсэтиигэ кытын.

Воркшоптар уонна маастар-кылаастар. Бэйэни сайыннарар дьоҕурдарга (soft skills), салайар үөрүйэххэ уонна да атын туһалаах хайысхаларга босхо дьарыктарга сырыт.

«Үлэ RAVE» open-air. Күнү быһа туһалаахтык сылдьан баран, киэһэ Саха сирин эстрадатын чаҕылхай сулустара Jeada, KitJah, Fiesta, Умсуура кыттыылаах улахан кэнсиэргэ сынньан!

Ким кыттыан сөбүй? Бэстибээл аана кимиэхэ барытыгар аһаҕас. Сааһынан хааччахтааһын суох! Манна кэлиэхтэрин сөп: оскуола үөрэнээччилэрэ уонна бүтэрээччилэрэ;  орто уонна үрдүк үөрэх устудьуоннара; үлэлии сылдьар, ол эрээри идэтин уларытыан эбэтэр карьератын үрдэтиэн баҕалаах дьон;  бэйэ дьыалатын саҕалыан баҕалаахтар.

Эдэр ыччат санаата

Сайаана Попова, ХИФУ устудьуона:

«Бэстибээл туһунан социальнай ситимнэртэн биллэбин уонна  сэҥээрбитим. Бу бэйэм идэбинэн ханнык үлэ миэстэтэ баарын эрэ буолбакка, дьиҥнээх профессионаллартан сүбэ-ама ылар, бэйэҕин көрдөрөр улахан кыах дии саныыбын. Ону таһынан, таптыыр артыыстарбыт кыттыылаах кэнсиэринэн күнү түмүктүүр – улахан бонус!»

Бу бэстибээл туох суолталааҕый? «Работай в Якутии» – бу көннөрү үлэ дьаарбаҥката буолбатах. Бу – өрөспүүбүлүкэ сайдыытыгар туһуламмыт, ыччаты дойдуга хаалларар, кинилэр талааннарын арыйар уонна үлэнэн хааччыйар соруктаах бөдөҥ бырайыак. Бэстибээл түмүгүнэн элбэх эдэр киһи стажировкаҕа, үлэҕэ ыҥырыы ылыа, оттон хампаанньалар бэйэлэригэр саҥа, кэскиллээх үлэһиттэри булуохтара диэн эрэнэбит.

Умнума! Күнэ-дьыла: от ыйын 16 күнэ. Буолар сирэ: «Үлэ кыбаартала» креативнай кластер (Труд уул., 1). Саҕаланар кэмэ: 14:00 ч. Киириитэ: Босхо!

Кэлин, кыттын, сайдын!

Алина Диодорова, ХИФУ устудьуона