Өлүөхүмэ куоракка волонтерунан кэргэннии Зоя, Петр Ждановтар үлэлииллэрин соһуйа истибитим. Кинилэр курдук кэргэнии волонтердары Саха сиригэр буолуоҕунааҕар, Арассыыйаҕа даҕаны булар ахсааннаҕа буолуо.
Зоя Семеновна — Өлүөхүмэтээҕи оҕо бибилэтиэкэтин сэбиэдиссэйэ. Кэргэнинээн Петр Евлампьевичтыын 7 оҕо тапталлаах ийэтэ, аҕата, 11 сиэн минньигэс эбээтэ, эһээтэ. “Эдэр саас” саайт үлэһиттэрэ волонтердааһыннара хайдах, туохтан саҕаламмытын ыйыталаһаары сибээскэ тахса сырыттыбыт.
— Бастатан туран, бибилэтиэкэҕэ үлэлиирим быһыытынан, эр киһи илиитэ өрүү ирдэнэр. Кэргэним Петр Евлампьевич өрүү көмөлөһөр. Иккиһинэн, Өлүөхүмэ куоракка “Бессмертнай полка” координаторынан буолабын. Онон сыллата сэлэлии хаамыыга кэргэммин, оҕобутун кытта бииргэ тахсабыт, инники эрээккэ турабыт. “Бессмертнай полка” туһунан норуокка иһитиннэрэбит, биллэрэбит, сырдатар инстаграмнаахпыт. Маныаха кэргэним, оҕолорбут өрүү күүс-көмө буолаллар. Арааһа, иититтэн улахан тутулуктаах быһыылаах.
Ааспыт сыл ахсынньытыттан коронавирус туһунан элбэхтик этилиннэ. Аан дойдуну барытын ытырчахтыы ылан иһэр ыарыы Саха сирин эмиэ тумнубата. Дьолго, Өлүөхүмэҕэ биир даҕаны түгэн бэлиэтэнэ илик. Култуура эйгэтигэр үлэлиирим, бибилэтиэкэ эйгэтин идэлээх сойуустарын бэрэссэдээтэлэ буоларым быһыытынан, улуустааҕы култуура управлениетын иһинэн волонтердар штабтара тэриллэн эрэрин истээт, кэргэммэр Петр Евлампьевичка эппиппэр, тута өйөөбүтэ. Инньэ гынан, кулун тутар ыйтан волонтердаан саҕалаабыппыт. Бэйэбит массыынабытынан сылдьабыт. Симиэнэнэн нэдиэлэҕэ биирдэ-иккитэ күн аҥаардыыта дьуһуурустубалыыбыт. Улахан илистиилээх эбээт диэбэппит. Холобура, сарсын эбиэт иннинэ турабыт. Бу иннинэ муус устар 30 күнүгэр күн бастакы аҥаарыгар дьуһуурустубалаабыппыт, 11 сакаас киирбитэ. Үксэ 60-тан үөһэ саастаах дьон эми-тому, бородууктаны сакаастыыр. Чопчу тугу, хантан ыларбытын ыйыталаһан баран кинилэр эппит аптекаларыттан, маҕаһыыннарыттан ылан илдьэбит. Астымматах, сыыһа ылбыккыт диир дьон суохтар. Барахсаттар харах уулаах махталларыттан, сороҕор киһи ытыах санаата кэлэр. Сорохтор массыынабытын номнуо билэллэр. Билигин таһырдьа сылаас буолан, көрдүлэр даҕаны утары тахсан көрсөллөр.
Биллэн турар, бары санитарнай-эпидемиологическай ирдэбили, быраабыланы тутуһабыт. Штаб дьуһуурустубабыт күнүгэр маасканан, бэрчээккинэн хааччыйар”, — диэн Зоя Семеновна кэпсиир.
Оттон волонтердуулларын таһынан сүрүн үлэлэрин умнубаттар. Дьиэлэриттэн олорон Кыайыы 75 сылын көрсө араас роликтары усталлар, оҕолорго аналлаах кэрчик устуулары, кинигэ быыстапкатын бэлэмнииллэр.
Элбэх оҕолоох ыал буолан оҕуруоту даҕаны хото олордоллор эбит. Икки тэпэлииссэлээхпит, номнуо оҕурсубутун, күөх тумабытын сии олоробут диэн Зоя Семеновна этэр.
Ждановтар дьиэ кэргэн девизтэрэ күүстээх. Ону хайдах баарынан тылбаастаабакка тиэрдэбит:
Наша семья — заряд позитива,
Порция дружбы и порция мира,
Мы ждем огромных, великих побед
Мы защищаем друг друга от бед.
Зоя, Петр Ждановтар курдук амарах сүрэхтээх, хаһан баҕарар, ханнык баҕарар түгэҥҥэ көмөлөһөргө бэлэм, ыарахантан чаҕыйбат дьиэ кэргэн үксүү турдун.
Людмила ПОПОВА, edersaas.ru