Судаарыстыбаннас күнүн көрсө Жатай бөһүөлэгэр “Олимпия” бассейн үөрүүлээх быһыыга-майгыга аһылынна. Бэлиэ күҥҥэ Ил Дархан Айсен Николаев ыалдьыттаата.
Сарсыардаттан чаҕылхай күннээх, ыраас халлааннаах күн үүннэ. Саҥа тутуу ыраахтан дьэндэйэн, тупсан көстөр. Киэһээҥҥи өттүгэр уота-күөһэ күлүмүрдээн, ыраахтан ыҥыра-угуйа турар курдук көстүөхтээх. Жатай олохтоохторо, оскуола оҕолоро саҥа тутуу аттыгар мустан, Ил Дарханы кэтэһэллэр. Өрө көтөҕүллүүлээх муусука тыаһыыр, шариктар, былаахтар бырааһынньыктыы настарыанньаны кэрэһилииллэр. Кырдьык, олохтоохторго үөрүүлээх күн.
Лоп курдук 10 чааска Айсен Николаев, Жатай уокуругун саҥа талыллыбыт баһылыга Евгения Исаева тиийэн кэлэллэр. Үгэс курдук, кинилэри сахалыы уохтаах кымыһынан, нууччалыы туустаах килиэбинэн көрүстүлэр. Сахалыы сиэринэн алгыс этилиннэ, хомус дьүрүһүйдэ. Оҕолор ыллаан, үҥкүүлээн көрдөрдүлэр.
— Судаарыстыбаннас күнүгэр Жатай дьоһун бэлэҕи тутта. Бассейны 2011 сылтан олохтоохтор бэйэлэрин күүстэринэн туталлар. Кэнники сылларга национальнай бырайыагы олоххо киллэрии чэрчитинэн, федеральнай бүддьүөттэн үп көрүллэрин ситиһэн, бассейн тутуллан бүттэ. Жатайга Уһук Илиҥҥэ уонна Сибииргэ суудуналары өрөмүөннүүр оҥорор бөдөҥ тэрилтэ (верфь) тутулла турар, онон үүнэр-сайдар кэскиллээх. Социальнай эбийиэктэри тутуу нэһилиэнньэ олоҕун хаачыстыбатын биллэ тупсарар, — диэн Айсен Сергеевич эттэ.
Кини Жатайдааҕы оҕо-ыччат спортивнай оскуолатын дириэктэрэ Валентина Свинобоеваҕа спортивнай тэрил ылалларыгар сертификат туттарда. Ону тэҥэ, 1989 сылтан бу күһүҥҥэ диэри Жатайга баһылыктаабыт, бу бассейны туттаран саҕалаабыт, бөһүөлэк сайдарыгар үгүс үлэни-хамнаһы ыыппыт Анатолий Кистеневка Ил Дархан Махтал суругун туттарда.
Саҥа тутууну үлэҕэ киллэрбит “Тутуу дирекцията” инвестиционнай-тутар фирма дириэктэрэ Сергей Никитин спортивнай оскуола дириэктэригэр бэлиэ быһыытынан көмүс күлүүһү туттарда. Ол кэннэ кыһыл лиэнтэни быһыы буолла. Өрөспүүбүлүкэ салайааччыларын сэргэ, кырачаан спортсменнар эмиэ быспыттара бэлиэ түгэн этэ.
Салгыы дьиэ иһигэр киирэн көрдүбүт. Дьоҕус соҕус буолан баран, аныгылыы ирдэбиллэргэ эппиэттиир, тупсаҕай көстүүлээх эбит. Иккис этээһигэр тренажернай саалалаах. Таҥнарга, суунарга усулуобуйа барыта баар. Бөһүөлэк баһылыга Евгения Исаева эппитинэн, манна оҕолор босхо дьарыктаналларыгар усулуобуйа баар буолуо, ону тэҥэ, төлөбүрдээх дьарыктарга ким баҕарар кэлэн, кыс ортото сөтүөлээн, харбаан, доруобуйатын бөҕөргөтүөн сөп.
Манна харбааһыҥҥа өрөспүүбүлүкэ чөмпүйүөннэрэ араас ньыманан харбаан, устан, умсан көрдөрдүлэр.
Ыспыраапка
50 миэтэрэ усталаах үс харбыыр суоллаах, “Олимпия” бассейн быйыл “Демография” национальнай бырайыак “Спорт – олох нуормата” эрэгийиэннээҕи бырайыагар киирсэн, тутуу түмүктэннэ. Уопсай иэнэ — 1 579,84 кв.миэтэрэҕэ тэҥнэһэр. Бассейн бырайыагын “Регион-Север” тэрилтэ оҥорбута. Тутуу биир сүрүн уратытынан ис үрдүн каркаһа турбаларынан ууруллуута буолла. Оттон ититии систиэмэтэ сир аннынан тардылынна, тымныыны тулуйар гына анаан оҥоһуллубут пластик турбалары туһаммыттар. Бу ититиини туттарга ороскуота кыра буолар. Тутуу уопсай ороскуота – 230 мөл. солк.
Ангелина Васильева, “Саха сирэ” хаһыат, edersaas.ru
Хаартыскалар: интэрниэт ситимиттэн