Саха Өрөспүүбүлүкэтигэр 50 тыһыынчаҕа диэри ахсааннаах нэһилиэнньэлээх пууннарга, бөһүөлэктэргэ, куораттыы типтээх бөһүөлэктэргэ, куораттарга үлэлии барар учууталларга биир кэмнээх төлөбүрү ыларга кыттааччылары сүүмэрдээһин куонкуруһун түмүгэ таҕыста.
edersaas.ru
Куонкуруска Арассыыйа 23 субъегыттан 124 кыттааччы докумуонун көрдүлэр. Куонкурус хамыыһыйатын быһаарыытынан, 19 вакантнай миэстэҕэ 18 кыайыылаах таҕыста. Кыайыылаахтар ааттарын СӨ Үөрэҕин уонна наукатын министиэристибэтин сайтыгар бу сигэнэн
https://minobrnauki.sakha.gov.ru/news/front/view/id/3173175
көрүҥ.
Хамыыһыйа быһаарбытынан, Орто Халыма улууһун А.Н.Явловскай аатынан Сылгы Ыытар орто оскуолатын математикаҕа уонна физикаҕа учууталын дуоһунаһа, СӨ Ил Дархана 2020 сыл тохсунньу 27 күнүгэр 986 №-дээх уурааҕынан бигэргэтиллибит, Кыттааччылары сүүмэрдээһин куонкуруһун балаһыанньатыгар олоҕуран, атын кыттааччыларга иһитиннэриллиэҕэ уонна сотору кэминэн биллиэҕэ.
СӨ Үөрэҕин уонна наукатын министиэристибэтэ ыам ыйын 19 күнүгэр “Земскэй учуутал” бырагыраама кыттааччылара, улуустааҕы үөрэх управлениетын бэрэстэбиитэллэрэ, куонкурус хамыыһыйатын чилиэннэрэ кыттыылаах Zoom платформанан аһаҕас кэмпириэнсийэҕэ 2020 сыллааҕы сүүмэрдээһин куонкуруһун түмүгүн таһаарда.
Бырагыраама салгыы түһүмэҕэ:
Ыам ыйын 16 — бэс ыйын 15 күннэрэ – куонкурус кыайыылааҕа үлэтин миэстэтин кытта билсэр (кыаллар буоллаҕына миэстэтигэр тиийии), кыайыылаах көһөр сайабылыанньатын суругунан толорсуу;
Бэс ыйын 5 — от ыйын 20 күннэрэ – үс өрүттээх үлэ дуогабарын түһэрсии;
Балаҕан ыйын 1 — ахсынньы 1 күннэрэ – төлөбүрү толоруу, ылыы.
“Земскэй учуутал” бырагыраама Арассыыйа Федерациятыгар 2020 сыл тохсунньутуттан дойду бэрэсидьиэнин сорудаҕынан киирбитэ. 50 тыһыынчаҕа диэри киһилээх тыа нэһилиэнньэлээх пууннарын, оробуочай бөһүөлэктэри, куораттыы типтээх бөһүөлэктэри, куорат оскуолаларын педагогическай кадырынан хааччыйар аналлаах.
РФ бэрэсидьиэнэ Владимир Путин сорудаҕынан, бырагыраама кыттыылаахтарыгар Уһук Илин уокурукка 2 мөлүйүөн солкуобай, онтон атын эрэгийиэннэргэ 1 мөлүйүөн солкуобай харчынан төлөбүр көрүллэр.
СӨ Үөрэҕин уонна наукатын министиэристибэтин пресс-сулууспата.