Бэҕэһээ-бүгүн батсаапка Уус Алдан улууһун Хоро нэһилиэгэр гааһы уонна ньиэби буллулар диэн иһитиннэрии киэҥник тарҕанна. Эбии «РФ бырабыыталыстыбатын бэрэссэдээтэлин уонна Саха сирин салалтатын сөбүлэҥнэринэн Хоро олохтоохторун суһаллык сэтинньи 4 күнүттэн Мындаабаҕа көһөрүҥ, манна ПАО «Газпром» уонна ОАО «Дагестаннефтьгазсбыт» үлэлиэхтэрэ, yktt.ru.com саайт иһитиннэрэр» диэн ис хоһоонноох буолан олохтоохтор соһуйдулар, «сымыйа сурах, дьиҥнээх үһү» диэн кэпсэтиини таһаардылар.
Бу сонуну Уус Алдаҥҥа үлэлиир геологтар уонна салалта сымыйанан биллэрдилэр.
«Биһиги Хоро нэһилиэгин территориятыгар от ыйыттан үлэлиибит. Гааһы уонна ньиэби көрдүүбүт, маннык үлэ хас даҕаны улууска бара турар. Билиҥҥитэ манна 18 киһи үлэлиир. Чааһынай тэрилтэ буолбатахпыт, тэрилтэбит акционернай уопсастыба да буоллар, судаарыстыбаннайдар ахсааннарыгар киирэр. Мантан гаас буллахпытына чугастыы бөһүөлэктэри хааччыйыыга үлэ барыахтаах. Хоро нэһилиэгин көһөрүү — сымыйа сурах«, — диэн «Иркутск—Геофизика» тэрилтэ баартыйатын начальнига Владимир Хоритоненко иһитиннэрэр.
Оттон Уус Алдан улууһун баһылыгын бастакы солбуйааччы Петр Попов: «Улуус салалтатын аатыттан биллэрэбин, бу сурах — сымыйа. Нэһилиэнньэлээх пууннары көһөрүү былааҥҥа турбат да, туруо да суоҕа. «Иркутск—Геофизика» тэрилтэ көрдүүр уонна чинчийэр үлэлэри ыытар. Бу үлэ улуус территориятыгар икки сыл иһигэр ыытыллан бүтүөхтээх» — диэн кэпсиир.
Дьулустаан Сергеев.