Дойдуга миниистирдэр саҥа састааптара ананна, оттон Юрий Трутнев бырабыыталыстыба бэрэссэдээтэлин солбуйааччытынан уонна Уһук Илин РФ бэрэсидьиэнин боломуочуйалаах бэрэстэбиитэлинэн хаалла.
edersaas.ru
Юрий Петрович 1956 сыллаахха кулун тутар 1 күнүгэр Пермь куоракка төрөөбүтэ. Пермскай политехническай институту бүтэрэн, хайа инженерэ идэлээх. Политикаҕа 1994 сыллаахха киирбитэ, Пермскайдааҕы куорат Дууматын дьокутаатынан талыллыбыта, икки сылынан куорат баһылыга буолбута. 2004 сыллаахха РФ айылҕа баайын миниистиринэн анаммыта.
2013 сыллаахха дойду Аҕа баһылыга Уһук Илини сайыннара Юрий Трутневы ыыппыта. Кини манна кэлиэҕиттэн саҥа экэнэмиичэскэй бэлиитикэ олоххо киирэн эрэр. Урутаан сайдар сиргэ 2160 резиденнэр уонунан миллиард дуолларга араас бырайыактары оҥороллор. Арассыыйаны кытта тэҥнээн көрдөххө, Уһук Илин бырамыысыланнас икки төгүл түргэнник сайдан иһэр.
Юрий Трутнев үлэлиир кэмигэр Бурятия уонна Забайкальскай кыраай Уһук Илин эрэгийиэнигэр киирдилэр. Ону таһынан, «Уһук Илиҥҥи гектар», эдэр ыалларга 2% ипотека нэһилиэнньэ олоҕун тупсарарга ананнылар, итиэннэ Уһук Илин сайдыытын национальнай бырагыраамата оҥоһуллан, дьон олороругар өссө үчүгэй усулуобуйа тэриллиэхтээх.
«Саха сирэ», edersaas.ru