Юрий Трутнев Аҕа дойду Улуу сэриитин бэтэрээннэрин уонна Уһук Илин олохтоохторун Улуу Кыайыы күнүнэн эҕэрдэлиир.
edersaas.ru
Күндү Уһук Илин олохтоохторо! Күндү бэтэрээннэр!
Быйыл Аҕа дойду Улуу сэриитигэр Кыайыы үбүлүөйүн бэлиэтиибит.
75 сыл анараа өттүгэр Сэбиэскэй Аармыйа фашизмы тохтотон, үлтүрүппүтэ, Европаны босхолообута, Арассыыйа аныгы көлүөнэтигэр тутулуга суох дойдуга эйэлээх халлаан анныгар олорор кыаҕы биэрбитэ. Биһиги кыргыһыы хонуутугар кыргыспыттары уонна тыылга туох баар күүстэрин-күдэхтэрин ууран үлэлээбиттэри кэриэстибит. Сэбиэскэй дьон хорсун быһыыларын түмүгэр биһиги, Арассыыйа билиҥҥи гражданнара олорор, үлэлиир, ыал буолар, оҕо төрөтөр кыахтанныбыт.
Сэрии саҕаламмытыгар Уһук Илин сэриилэһэ сылдьар аармыйаҕа саппааска кубулуйбута. Сэрии бары түөрт сылын устата ньиэмэс халабырдьыттарын кытта кыргыһыыга Уһук Илиҥҥи фронт 42 холбоһуга кыттыбыта. Кинилэр Москваны көмүскээбиттэрэ, Сталинград анныгар кыргыспыттара, Мурманскайы харабыллаабыттара, Праганы ылбыттара. Сэбиэскэй Уһук Илин тыылга кубулуйан, тутуу тохтооботоҕо, саҥа собуоттар уонна рудниктар тэриллибиттэрэ, саҥа суоллар тэлгэммиттэрэ.
Онон биһиги уопсай ытык иэспит – норуоппут дьоруойдуу быһыытын туһунан өйдөбүлү илдьэ сылдьыы, бэтэрээннэргэ кыһамньылаахтык сыһыаннаһыы, Ийэ дойдуну таптааһын уонна харыстааһын! Улуу Кыайыы күнүнэн! Дьолу-соргуну, чэгиэн доруобуйаны, эйэни, чугас дьоҥҥут уонна аймахтаргыт кыһамньыларын баҕарабын!
Юрий Трутнев, Арассыыйа Федерациятын
Бырабыыталыстыбатын Бэрэссэдээтэлин солбуйааччы –
Арассыыйа Федерациятын Бэрэсидьиэнин
Уһук Илин федеральнай уокуругар боломуочуйалаах бэрэстэбиитэлэ.