Юрий Трутнев инвестиция туһунан санаатын эттэ

Бөлөххө киир:

Сэтинньи 27 күнүгэр РФ бэрэсидьиэнин Уһук Илин  федеральнай уокуругар  боломуочуйалаах бэрэстэбиитэлэ Юрий Трутнев кыттыылаах  Уһук Илин уокуругун Сэбиэтин сүбэ мунньаҕа  Дьокуускай куоракка  буолла.

Мунньахха РФ  Уһук Илин уонна Арктика сайдыытын миниистирэ Александр Козлов, федеральнай биэдэмистибэлэр бэрэстэбиитэллэрэ, Уһук Илин бары эрэгийиэннэрин баһылыктара кытыннылар. Бастакынан Уһук Илин эрэгийиэҥҥэ ыытыллар инвестиция туһунан кэпсэттилэр. Юрий Трутнев  Сэбиэт мунньаҕа Саха сиригэр ыытыллыбыта мээнэҕэ буолбатах диэтэ: «Саха сирэ, Сахалин уонна Амур уобалаһа  инвестиция өттүгэр үчүгэй көрдөрүүлээхтэр. Уокурукка  судаарыстыба өттүттэн өйөбүллээх  2 тыһыынча инвестиция бырайыага ыытылла турар».

Инвестиция боппуруоһуттан  эрэгийиэн экэниэмикэтин  сайдыыта, нэһилиэнньэ олорор усулуобуйатын тупсарыы  тутулуктаах диэн Юрий Трутнев бэлиэтээн эттэ.  Ити бырайыактарынан 160 тыһыынча үлэ миэстэтэ тахсара күүтүллэр.

Салгыы  2 %-наах анал ипотека туһунан кэпсэтии буолла. Бу ипотека саҥа тутуллар дьиэҕэ кыбартыыра ылар эдэр ыалларга уонна  гектар сири ылбыт дьон дьиэ тутталларыгар  ананар. Бырагырааманы РФ Уһук Илин уонна Арктика сайдыытын министиэристибэтэ бэлэмнии сылдьаллар.

Бу туһунан СӨ Ил Дархана Айсен Николаев маннык эттэ: “Чэпчэтиилээх ипотека хайдах үлэлиирэ бу күннэргэ быһаарыллыаҕа. Ипотека кыттыылааҕын сааһа 35 –кэ диэри диэн быһыллынна”.

Салгыы Уһук Илин аэропортарын тутуу уонна саҥардыы туһунан кэпсэтии буолуоҕа.

Ньургуйаана Иванова, «Саха сирэ» хаһыат, edersaas.ru,

хаартыска ЯСИА саайтыттан.

+1
0
+1
0
+1
0
+1
0
+1
0
+1
0
+1
0