Арассыыйа бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ, вице-премьер Юрий Трутнев Дьокуускай куоракка кэллэ.
Бүгүн сарсыарда вице-премьер кыттыылаах Уһук Илин федеральнай уокуругун Сэбиэтин сүбэ мунньаҕа буолла. Күн иккис аҥарыгар Юрий Трутнев, РФ Уһук Илин уонна Арктика сайдыытын миниистирэ Александр Козлов уонна Ил Дархан Айсен Николаев “Уһук Илин аэропортарын тутуу уонна саҥардыы” диэн мунньах спикердарынан үлэлиэхтэрэ.
Ону таһынан, Юрий Трутнев бүгүн Дьокуускай куоракка ыытылла турар «Өйдөөх куорат – олорорго табыгастаах эйгэ» диэн Уһук Илиҥҥи форум пленарнай мунньаҕар кыттыаҕа. Киэһэ “Кыһын Саха сириттэн саҕаланар” диэн бүтүн Арассыыйатааҕы бэстибээл чэрчитинэн Дьокуускай куорат 202–ис түөлбэтигэр буола турар муус оҥоһуктар аан дойдутааҕы күрэстэрин түмүк түһүмэҕэр ыалдьыттыаҕа. Оттон сарсын, сэтинньи 28 күнүгэр, “Саха сирэ – урутаан сайдыы территорията” диэн сүбэ мунньахха кыттыыны ылыаҕа.
Ньургуйаана Иванова, «Саха сирэ» хаһыат, edersaas.ru
хаартыска СИА саайтыттан.