Күндү Нам улууһун олохтоохторо, ытыктабыллаах ыалдьыттар!
“Нам улууһа” муниципальнай тэриллии дьаһалтатын, улуус дьокутааттарын Сэбиэтин уонна тус бэйэм ааппыттан барыгытын самаан сайыммыт салаллан кэлбитинэн, үрүҥ тунах, уйгу-быйаҥ Ыһыаҕынан итиитик-истиҥник эҕэрдэлиибин!
Эҥсиэли хочотун килбэйэр киинигэр – ытык Нам сиригэр XIII өрөспүүбүлүкэтээҕи Олоҥхо ыһыаҕын тэрийэрбититтэн, сиэдэрэй түһүлгэни төрүттүүрбүтүнэн биһиги, Нам сирин олохтоохторо, олуһун диэн киэн туттабыт!
Олоҥхо ыһыаҕа Саха норуотун түмэр, норуот айымньытын, фольклорун бары көрүҥнэрин көрдөрөр, аҕыйах ахсааннаах норуоппут сайдар суолун тобулар, кэлэр көлүөнэҕэ омукпут уратытын көрдөрөр сүдү тэрээһин буолар.
Биһиги, элбэх омуктаах Сахабыт сирэ салгыы сайдан иһэригэр, норуоппут биир сомоҕо буоларыгар, өрөспүүбүлүкэбит чэчирии сайдарыгар сүҥкэн кылааты киллэрсибит уонна ситиспит биһиги киэн туттар биир дойдулаахтарбыт, Нам чулуу уолаттара, Саха сирин чаҕылхай, уһулуччулаах судаарыстыбаннай уонна бэлитиичэскэй диэйэтэллэрэ Максим Кирович Аммосов, Илья Егорович Винокуров буолаллар.
Үс үллэр үөстээх Өлүөнэ эбэбит биир маанылаах киэҥ хочотугар – Эҥсиэлигэ былыр-былыргыттан уус-уран тыллаах олоҥхоһуттар төрөөн-үөскээн олорон ааспыттара. Ол курдук, Артымыан, Мачайар, Дьөгүөр Охулуопкап-Буоратай, Баһылай Попов-Бочоох, Өлөксөөндүр Бөтүрүөп-Чааскылатар, Охонооһой Сиипсэп-Дьиибэ Бытык, Хабырылла Кыычыкын-Хабыанньа олоҥхоһуттар дьоҥҥо-сэргэҕэ киэҥник биллибиттэрэ.
1939 сыллаахха Саха сирин суруйааччыларын маҥнайгы сийиэһигэр сүдү норуот ырыаһыттара Прокопий Прокопьевич Ядрихинскэй-Бэдьээлэ, Егор Герасимович Охлопков-Буоратай ССРС Суруйааччыларын сойууһун чилиэнинэн киирбиттэрэ элбэҕи этэр.
Нам улууһугар 2019 сыл Олоҥхо сылынан биллэриллибитэ. Үйэлэри уҥуордаан илдьэ кэлбит үтүө үгэстэрбитин кэлэр көлүөнэлэргэ бүөбэйдээн, харыстаан чөл тириэрдии — бу биһиги ытык иэспит.
Саха ыһыаҕа мэлдьитин ил-эйэ, доҕордоһуу туоната, түмсүү түһүлгэтэ буолан, омук быһыытынан олоххо тирэхтээхпитин, инникигэ эрэллээхпитин кэрэһилии турдун! Саха норуота эбиллэ, үксүү турдун, кыаҕа улаатан, күүһүрэн истин! Кэнчээри ыччаппыт ситиһиилээх, дьулуурдаах, инникигэ эрэллээх буоллун.
Юрий Слепцов,
Нам улууһун баһылыга