Ыһыахтары ыытары улуус баһылыктара быһаарыахтара...
· - Олох-дьаһах

Ыһыахтары ыытары улуус баһылыктара быһаарыахтара

Бүгүн, ыам ыйын 28 күнүгэр, Айсен Николаев Саха Өрөспүүбүлүкэтин Аҕа Баһылыгын эбээһинэһигэр киирбитэ икки сыла буолла.

Үгэс быһыытынан, кини бүгүн өрөспүүбүлүкэ сонуннары киэҥник тарҕатар тэрилтэлэр салайааччыларын кытта көрүстэ уонна кинилэр ыйытыыларыгар хоруйдаата. Ол эрээри, тэрээһин бу сырыыга уратытык ыытылынна – билиҥҥи кэм ирдэбилининэн, Ил Дархан интэриниэт ситимин нөҥүө сэһэргэстэ.

Үгүс саха дьонун быйылгы ыһыахтар дьылҕалара долгутара баар суол. Бу туһунан Айсен Сергеевич маннык диэтэ:

— Бүгүҥҥү күҥҥэ сорох улуустарга коронавируһунан ыалдьыбыт дьон суох уонна суох буолуохтара диэн эрэниэҕи баҕарыллар. Оттон Дьокуускайга, Нам улууһугар балаһыанньа уустук. Онон улуустар баһылыктара бэйэлэрэ көрөн быһаарыныы ылыныахтара – ыһыахтары ыыталларын эбэтэр ыыппаттарын. Ыытар түгэннэригэр туох баар санитарнай ирдэбиллэри булгуччу уонна кытаанахтык тутуһаллара ирдэниэҕэ.

Биллэн туран, сайыны быһа ыһыахтыыры утарабын. Ол эрээри, биир чопчу күҥҥэ ыытары эмиэ ылыммаппын. Бу биһиги былыр-былыргыттан илдьэ кэлбит үтүө үгэспит буолар. Мин санаабар, бэс ыйын 21 күнүттэн саҕалаан нэдиэлэ устата, муҥутаатаҕына уон күн иһигэр, Саха сиригэр ыһыахтар ыытыллан бүтүөхтээхтэр. Дьокуускайтан анаан-минээн улахан бөлөхтөр баралларын бобуохпут. Бу туһунан анал дьаһалы таһаарыахпыт.

Киин куорат баһылыга Туймаада ыһыаҕын интэриниэт ситимин нөҥүө ыытарга быһаарыммыта. Бу маны мин өйөөбөппүн да, утарбаппын да. Бу кини Дьокуускай куорат баһылыгын быһыытынан быһаарыныыта буолар.

Олоҥхо ыһыаҕын Өлүөхүмэ улууһа ыытыан баҕарар. Бу улууска биир эрэ киһи коронавируһунан ыалдьыбыта, кинини тутатына Дьокуускайга аҕалбыттара. Киин куораттан бу тэрээһиҥҥэ көмөлөһө олох аҕыйах киһи, элбээтэҕинэ 50-ча киһи барыаҕа. Атын ыалдьыттар аҕыйах буолуохтаахтар. Маны таһынан, туох баар санитарнай ирдэбиллэри булгуччу уонна кытаанахтык тутуһуллуохтаах.

Бүтэһиктээх быһаарыыны бэс ыйын 10 күнүн диэки, ол саҕана санитарнай-эпидемиологичскэй балаһыанньа хайдах буоларыттан көрөн ылыныахпыт.

Родион Кривогорницын, «Саха сирэ» хаһыат, edersaas.ru

СИА хаартыската.

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

четыре − 1 =