Кыһын буолан, ырыынакка сайыҥҥы курдук элбэх массыына атыыга турбат. Халлаан да тымныы. Массыына атыытынан эргинэр эрэттэр этэллэринэн, саҥа сыл бастакы кыбаарталыгар сыана түһүө да, үрдүө да суоҕа.
Александр ТАРАСОВ, «Саха сирэ» хаһыат, edersaas.ru
Билигин тимир көлө кыһыары күһүҥҥү сыананан атыыланар. Тоҕо итиннигий? Сүрүн төрүөт биир: кыһын, онон атыылааччы да, атыылаһааччы да аҕыйах. Ол гынан баран, субуоталаах өрөбүлгэ ырыынак син тиллибиккэ дылы буолан, атыы-тутуу барар. Массыына адьас атыыламмат диир эмиэ сыыһа. Билигин үгүс дьон Владивосток, Новосибирскай, Благовещенскай куорат ырыынактарыттан бэйэлэрэ атыылаһан, сүүрдэн аҕалаллар.
Нэһилиэнньэ, ортотунан, 300 тыһ. солк сыаналаах «Ипсум», «Гайя» уонна «Филдер» («тойоталар») курдук тимир көлөлөрү атыылаһар эбит. Манан эргинэр уолаттар үксүн дьоҕус массыыналар атыыга хамаҕатык бараллар дииллэр. Тоҕото биллэр. Ол курдук, сыаналара удамыр уонна бензини улахаттар курдук «ыньырбахтаабаттар».
Массыынанан эргинээччилэр ырыынакка сааһыары сэргэхсийии буолуо дииллэр. Кулун тутартан саҕалаан, сыана арыый үрдээбитинэн барыаҕа. Ол курдук, билиҥҥи сыана аны саас тута 10 бырыһыанынан үрдүөҕэ диэн сабаҕалыыллар. Маннык буолара өйдөнөр. Бастатан туран, тоҥоруллан турар массыыналарын ириэрэн таһаараллар. Үгүс киһи атыылыыр уонна атын массыынаны атыылаһар. Сааһыары өрүү сэргэхсийии буоларын курдук буолуоҕа.
Александр ТАРАСОВ, «Саха сирэ» хаһыат, edersaas.ru