«Үрдэл-2019» алтыс музыкальнай бириэмийэ финалистарын талыы «Саха» НКИХ ханаалыгар балаҕан ыйын 14 күнүттэн саҕаланар уонна ахсынньыга түмүктэнэр.
«Тэтим» араадьыйаҕа бу сыл устата 200-чэ саҥа ырыа киирдэ. Биһиги сайтка дьон сөбүлээбитинэн, төһө сакаастыылларынан көрөн бастыҥнары талабыт. Ол кэннэ ырыаһыттар «Үрдэл» биэриигэ кэлэллэр. Биэрии хас субуота аайы буолар. Балаҕан ыйын 14 күнүгэр бастакы кыттааччылары кытта эфир буолуоҕа», — диэн продюсерскай киин дириэктэрэ Марфа Пермякова кэпсиир.
Быйыл «Үрдэл» үрүҥ көмүс бириэмийэ «Бастыҥ ырыа», «Куоластааһын түмүгүнэн бастыҥ ырыа», «Бастыҥ эр киһи толорооччу», «Бастыҥ кэрэ аҥар толорооччу», «Бастыҥ үҥкүүлүүр хит», «Бастыҥ эдэр толорооччу», «Бастыҥ дуэт» анал хайысхаларынан туттарыллыаҕа.
Маны таһынан, «Бастыҥ ааптар», «Бастыҥ матыып», «Бастыҥ аранжировка» уонна «Бастыҥ клип» анал ааттары иҥэриэхтэрэ.
«Үрдэл» музыкальнай бириэмийэ алтыс төгүлүн буолар, саҥа талааннары таһаарар, сахалыы ырыаны киэҥ араҥаҕа таһаарар аналлаах.
#саха_нких_сонуннара