Ыраах нэһилиэктэргэ «Почта-баан» үлэлиэҕэ

Ааптар: 
Бөлөххө киир:

Бэҕэһээ Москваҕа Саха сирин сибээскэ уонна иһитиннэрэр технологияларга миниистирэ Александр Борисов “Россия почтата” ФГУП генеральнай дириэктэрин бастакы солбуйааччы Алексей Скатины кытта көрүстэ.

Өрүттэр өрөспүүбүлүкэҕэ почта сибээһин саҥардыы уонна сайыннарыы туһунан боппуруостары дьүүллэстилэр.

edersaas.ru

Көрсүһүүгэ “Россия почтата”билигин көхтөөхтүк дьүүллэһиллэ сылдьар беспилотниктары туһаныыга бырайыагын туһунан кэпсэттилэр. Почта операторын генеральнай дириэктэрэ Николай Подгузов иһитиннэрбитинэн, аппарааттары өрөспүүбүлүкэ сиригэр-уотугар боруобалыахтара (тест ыытыахтара). Кэпсэтии кэмигэр беспилотниктар эрэ тустарынан буолбакка, “Россия почтата” почта таһаҕаһын тириэрдиигэ дьоҕус авиацияны ылыытын уонна итилэр Саха сирин аэропортарыгар базаланыыларын чопчуластылар.

Александр Борисов“Биһиги техническэй ирдэбиллэри, логистиканы торумнааһыҥҥа көмөлөһөргө, оробуочай бөлөхтөр үлэлэригэр кыттарга бэлэммит” —  диэн  бырайыагы олоххо киллэриигэ эксперт быһыытынан көмөлөһүүгэ этии киллэрдэ. Тустаах салайааччылар бырайыагы Саха сиригэр олоххо киллэрии болдьоҕун быһаардылар, ол быһыытынан 2018 сыл бастакы аҥаарыгар саҕаланара былааннанна.
Өрүттэр маны сэргэ, өрөспүүбүлүкэ почтатын сибээһин салааларыгар “Почта-баан” тиһигин сайыннарыы былаанын туһунан кэпсэттилэр. Миниистир бэлиэтииринэн, маннык көрүҥ баан бэйэтин ороскуотун аччатарыгар көмөлөһүөҕэ, атын бааннар сабыллыбыт сирдэригэр үлэлииллэригэр кыаҕы биэриэҕэ. Кэлэр сылга “Россия почтата” Саха сирин почтатын салааларыгар баан түннүгүн тиһигин кэҥэтэргэ былаанныыр. Санатан эттэххэ, Илиҥҥи экономическай форумҥа Саха сирин Ил Дархана Егор Борисов “Почта-бааны” кытта сөбүлэһиигэ илии баттаспыта. Итиннэ олоҕуран, баан бэйэтин түннүктэрин үп-харчы өҥөтүнэн хааччыйыы үрдүк социальнай суолталаах Саха сирин тэйиччи сытар уонна уустук суоллаах-иистээх нэһилиэнньэлээх пууннарыгар арыйыаҕа.
Алексей Скатин Мирнэй куоракка норуоттар икки ардыларынааҕы почтанан атастаһыы пуунун тэрийэр туһунан сонуннары киэҥник тарҕатар ситимнэргэ уоста быһыытыйбыт сытыы боппуруоска санаатын үллэһиннэ. Алексей Владимирович этэринэн, регистрацияламмат почта кыһалҕата бүгүн турбат. Ол эрээри Мирнэйгэ ММПО бэйэтин үлэтин сэтинньигэ саҕалыаҕа. Итини арыйыынан сибээстээн, Мирнэй куорат “Россия почтатын” магистральнай сөмөлүөттэрин көтүүтүн маршрутугар киллэриллиэҕэ. Александр Борисов Саха сирин олохтоохторун норуоттар икки ардыларынааҕы интернет-маҕаһыыннартан сакаастарын тириэрдии түргэтиэҕэ диэн эрэлин биллэрдэ.

Женни Стрюкова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0