Үөһээ Бүлүүгэ челлендж куоластааччылары түмтэ

Бөлөххө киир:

Үөһээ Бүлүү улууһугар барыта 11307 быыбардааччы баарыттан билигин 9238 киһи куоластааһыҥҥа кытынна. Бу быыбардааччы 81,70 %-на буолар.


Улуус киин быыбардыыр хамыыһыйатын бэрэссэдээтэлин солбуйааччы Александра Иванова куоластааһын хаамыытын туһунан маннык иһитиннэрэр:

“Улуус үрдүнэн 34 быыбардыыр учаастак үлэлиир. Онтон Быракааҥҥа – 98 %, Балаҕаннаахха 95 %, Тамалакааҥҥа 91 %, Харбалаахха 95 %, Кэнтиккэ 95 %, Мэйиккэ 94 % быыбардааччы көхтөөхтүк кыттан, куоластааһын түмүктэннэ да диэххэ сөп.

Куоластааһын иннинэ 8400 киһи болдьоҕун иннинэ кыттыбыта. От ыйын 1 күнүгэр быыбардыыр учаастактар бары үөрүүлээх быһыыга-майгыга үлэлэрин саҕалаабыттара. Өрөгөй ырыатын истибиппит уонна күнү быһа муусука холбонон турда. Куоластааһыҥҥа туох да кэһиллии тахсыбата, санитарнай миэрэлэр эмиэ барыта тутуһулуннулар, барыта орун-оннугар ыытылла турар.

Быйыл аан бастакытын куоластааһыҥҥа кыттар оҕолорго диэн сэмэй бэлэхтэри туттардыбыт. Манна диэн эттэххэ, ыччат тэрээһиҥҥэ олус көхтөөхтүк кытта сылдьар. Бэс ыйын 25 күнүттэн араас челленджтэри тэрийдилэр, видеороликтары уһуллулар. Улуус үрдүнэн отучча волонтер көмөлөһөр.

Быыбардыыр учаастактарбытыгар ааспыт үйэ 70-с сылларыттан бэрэссэдээтэллиир дьон билигин даҕаны салайа, үлэлии-хамсыы сылдьар. Ол курдук, Маҥааска Алексей Степанов, Мэйиккэ Еремей Протопопов, Маай учаастагар Егор Алексеев, Хороҕо Николай Николашкин. Кинилэри сэргэ ыччаппыт эмиэ хамыыһыйаҕа үлэлэһэн эрэллэрэ үөрдэр — эдэркээн бэйэлээх Степан Степанов Кырыкыйга уонна Марианна Лазарева Боотулууга.

Куоластааһын саҕаламмыт күнүгэр улуустааҕы ыһыахпыт ыытыллыбыта. Онон 76-с хамыыһыйа чилиэннэрэ сахалыы таҥнан-симэнэн куоластааччыларын көрсүбүттэрэ дьон-сэргэ болҕомтотун тарта. Аны кыргыттар бэйэлэрин истэригэр маастар-кылаастааннар, оҕуруонан киэргэл оҥостубуттар.

Улууспут баһылыгын, өрөспүүбүлүкэбит Ил Дарханын тула түмсүөххэйиҥ диэн санаалаах челленджтэр ыытыллыбыттара. Олохтоохтор батсаапка тустаах хартыыҥкалары таһаарбыттара, патриоттуу санааны өрө көтөхтө быһыылаах. Бу быһыы-майгы дьон көхтөөхтүк куоластыырыгар дьайбытын саарбахтаабаппын».

edersaas.ru

Хаартыскалары Александра Иванова тиксэрдэ.

+1
0
+1
0
+1
0
+1
0
+1
0
+1
0
+1
0