Дьокуускай куорат ыччакка уонна дьиэ кэргэн бэлиитикэтигэр управлениета чөл олоҕу тарҕатар сыаллаах үлэтин тиһиктээхтик тэрийэр. Ол туһуттан анал рейдэлэри оҥорор, өйдөтөр-сүбэлиир, сырдатар үлэлэри хаһыаттарынан, телебиэриилэринэн ыытар, үөрэх кыһаларыгар көрсүһүүлэри тэрийэр.
Бу күннэргэ уочараттаах рейдэни Сайсары, Строительнай, Киин, Гагаринскай уонна Промышленнай уокуруктарга оҥордулар. Итиэннэ итилэртэн түөрдүгэр сокуоннай саастарын туола илик оҕолорго арыгыны атыылыылларын биллилэр.
Чөл олоҕу тарҕатар, арыгыны утарар сыаллаах-соруктаах рейдэни ыччат уонна дьиэ кэргэн бэлиитикэтин управлениета «Вместе Теплее» уопсастыбаннай түмсүү көхтөөх кыттааччыларын кытта тэрийдилэр.
«Биһиги маннык рейдэни хаһыс да тэрийиибит. Хомойуох иһин, куораппытыгар арыгыны атыылыыр маҕаһыыннар элбээн иһэллэр. Өссө хомолтолооҕо уонна киһини дьиксиннэрэрэ, оҕолор кыраадыстаах утаҕы иһэллэрэ элбээбитэ бэлиэтэнэр», — диир управление начаалынньыга Константин Соколов.
Рейдэ оҥоһуллубутун түмүгүнэн матырыйааллар «Якутское» ИДьМ МТ бэриллибиттэр. Ыччат уонна дьиэ кэргэн бэлиитикэтигэр управление куорат бары олохтоохторун чөл, чэгиэн олоҕу тутуһалларыгар ыҥырар итиэннэ сокуоннай саастарын туола илик оҕолорго арыгыны атыылыыр түгэннэри көрдөхтөрүнэ, туора хаампакка, полиция үлэһиттэригэр тута биллэрэллэригэр сүбэлиир.
Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытары үлэлиир Департамент