Кулун тутар 21 күнүгэр Ил Дархан Айсен Николаев ЯТЭК хампаанньа билиҥҥи үлэтин-хамнаһын туһунан быһааран кэпсээтэ.
edersaas.ru
— ЯТЭК хампаанньа үлэтэ хайдах да тохтуур кыаҕа суох, тоҕо диэтэр, өрөспүүбүлүкэбитигэр стратегическай, тыын суолталаах, олоҕу хааччыйар тэрилтэ буолар.
Билигин хампаанньа этэҥҥэ үлэлии турар. Салалтата дьиэҕэ олорон үлэлиир эрэсиимҥэ көспүтэ, оттон туох баар производственнай үлэ-хамнас тохтообокко, бытаарбакка, бэйэтин эрэсииминэн бара турар.
Сорох социальнай ситимнэргэ ЯТЭК үлэһиттэрин буруйдууллар, соруйан ыалдьыбыттарын курдук суруйаллар. Ити сыыһа. 3 тыһыынча кэриҥэ биир дойдулаахтарбыт омук дойдуларыттан кэлэн, дьиэлэригэр хааччахтанан олороллор. Анаалыс туттарбыттара, баҕар, кинилэртэн ким эмит ыалдьыбыта биллэ илик буолуон сөп. Сорохтор кэлэн баран, ыалдьыбыттарын да үрдүнэн, көннөрү тумуу диэн, бырааска көрдөрөргө ыксаабаттар. Онон, бу ыалдьыбыт дьон миэстэтигэр ким баҕарар буолуон сөбүн өйдөөн туран, холкутук сыһыаннаһарга ыҥырабын, — диэн Айсен Сергеевич эттэ.
Санатар буоллахха, аан бастаан ЯТЭК хампаанньа генеральнай дириэктэрэ, онтон үлэһиттэр коронавируһунан ыалдьыбыттара биллибитэ. Билигин кинилэр Дьокуускай куорат инфекционнай балыыһатыгар эмтэнэ сыталлар.
Ангелина Васильева, »Саха сирэ» хаһыат, edersaas.ru