Сунтаар улууһугар, «Кириэстээх» кэпэрэтиип хонтуоратыгар олус сэргэх тэрээһин буолан ааста.
edersaas.ru
Кэпэрэтиип үлэһиттэри көҕүлүүр сыаллаах күрэхтэһиини тэрийдэ — «Улуу Кыайыы өрөгөйдөөх үбүлүөйүн күргүөмнээх, түмсүүлээх үлэнэн уруйдуубут! Айхаллыыбыт!» диэн ыҥырыы тыллаах «Кириэстээх» кэпэрэтиип ыанньыксыттарын уонна ньирэй көрөөччүлэрин икки ардыларыгар күрэхтэһиини биллэрдэ.
Балаһыанньа быһыытынан ыанньыксыттар күрэхтэһиилэрин саҕаланыыта өссө бу дьыл олунньу 25 күнүттэн саҕаламмыт, түмүгэ от ыйын 24 күнүгэр таһаарыллыахтаах. Ыанньыксыттарга билиҥҥитэ тоҕус киһи күрэхтэһэ сылдьар: Владимир Михайлов, Елизавета Никифорова, Валентина Максимова, Евдокия Никитина, Галина Кириллина, Василий Архипов, Февралина Кондратьева, Анжелика Петрова, Петр Спиридонов.
Ньирэй көрөөччүлэр күрэхтэһиилэрэ ыам ыйын 9 күнүттэн саҕаланан баран, алтынньы 6 күнүгэр түмүктэниэҕэ.
Кыайыылаахтары наҕараадалыырга кэпэрэтиип бырабылыанньата 1 мөл. солк. көрбүт. Ол курдук ыанньыксыттарга да, ньирэй көрөөччүлэргэ да бастакы миэстэ иһин 250 тыһ. солк., иккис, үһүс миэстэлэргэ 150 тыһ., 100 тыһ. солк. көрүллүбүт. Онон кытаанах киирсиилэр буолуохтара диэн тэрийээччилэр сыаналыыллар.
Ыанньыксыттар ортолоругар билиҥҥитэ Елизавета Никифорова бастаан иһэр. Иккис миэстэҕэ Февралина Кондратьева, үһүскэ Василий Архипов, төрдүскэ Анжелика Петрова, бэһискэ Петр Спиридонов, алтыс миэстэҕэ Владимир Михайлов иһэллэр. Түмүк нэдиэлэ аайы тахсар.
Олус сэргэх тэрээһини көҕүлээччилэринэн «Кириэстээх» ТХПК бырабылыанньата, чуолаан кэпэрэтиип бэрэссэдээтэлэ Владимир Егоров уонна тэрилтэ кылаабынай зоотехнига Августина Трифонова буолбуттара кэрэхсэбиллээх.
«Саха сирэ» хаһыакка, edersaas.ru саайтка анаан
Сунтаартан Гаврил Андреев.