Быйыл “СӨ ОДьКХ” ГУТ Горнай улууһунааҕы филиала киин ититэр ситимҥэ 80 кэтэх ыал дьиэтин холбоото. Бу ааспыт сылы кытта тэҥнээтэххэ ахсаан өттүнэн улахан көрдөрүү.
Тыа сирин олохтоохторо сылаастык олороллорун туһугар ыытыллыбыт үлэ түмүгэр Бэрдьигэстээх, Орто Сурт, Кэптин, Дьиикимдэ, Маҕарас уонна Өрт сэлиэнньэлэрин олохтоохторо оһох оттор диэн тугун умуннулар. Ол курдук, ордук элбэх дьиэ Дьиикимдэҕэ (23), Орто Суртка (22) холбоннулар. Мытаахтар ититэр ситимҥэ холбоммуттарын үөрүүтүн бу күннэргэ “Саха” НКИХ нөҥүө үгүс киһи көрөн ымсыырда.
“СӨ ОДьКХ” ГУТ пресс-сулууспата иһитиннэрэринэн, Дьиикимдэҕэ 2012 сыллаахха 4,6 МВт кыамталаах хочуолунай тутуллубута. Ол кэнниттэн Орто Суртка эмиэ итинник кыамталаах хочуолунай үлэҕэ киирбитэ бу холбооһуннарга улахан төһүү буолбута чахчы.
Тустаах тэрилтэ өрөспүүбүлүкэ үрдүнэн элбэх ыал дьиэтин холбоото. Кэнники үс сыл устата муниципальнай тэриллиилэри кытта кыттыгас үбүлээһин суотугар судаарыстыбаннай тэрилтэ инвестиционнай бырагырааматыгар олоҕуран киин ититэр ситимҥэ 3746 дьиэ холбоммута. Быйыл ГУТ филиаллара 882 кэтэх ыал дьиэтэ холбоноругар сөптөөх үлэни-хамнаһы ыыттылар.
“Биһиги тэрилтэбит уонна олохтоох салайыныы уорганнарын хардарыта тиһиктээх үлэлэрин, былаас уорганнарын өйөбүлүнэн быйыл өрөспүүбүлүкэ 14 оройуонугар 44 нэһилиэнньэлээх пууҥҥа 615 дьиэ биһиги хочуолунайдарбытыгар сылааска холбонно. Бу хайысханан үлэни салгыы ыытыахпыт”, — диэтэ генеральнай дириэктэр Виталий Чикачев.
“СӨ ОДьКХ “ГУТ пресс-сулууспатын матырыйаалынан Женни Стрюкова бэлэмнээтэ.
Хаартыскаҕа: Киин ититэр ситимҥэ холбонуу үөрүүлээх түгэннэрэ. Пресс-сулууспа хаартыската