«Якутия» авиахампаанньа сөмөлүөккэ дьону арыаллааччылары (бортпроводниктары) үлэҕэ ыларга күрэх биллэрэр. Ол туһунан официальнай саайтыгар иһитиннэрэр. Аан дойду аанын арыйар бэрт интэриэһинэй үлэ өрөспүүбүлүкэ улуустарын, Арассыыйа, СНГ киин куораттарын, Соҕурууҥҥу Илин Азия уонна да атын омук сирдэрин хабар.
edersaas.ru
Сүрүн ирдэбил: үлэ көрдөөччү Арассыыйа төрүт олохтооҕо буолуохтаах, орто тиэхиньиичэскэй үөрэхтээх, нууччалыы чуолкайдык саҥарар, английскай тылы Pre-Intermediate таһымыгар билэр, доруобуйатынан хааччаҕа суох буолуохтаах. Сааһа 18-27 диэри.
Авиахампаанньа эйэҕэс-сайаҕас, дьону кытта сатаан тапсан кэпсэтэр, аламаҕай, биир хамаандаҕа табыллан үлэлиир, эппиэтинэстээх, бэрээдэктээх, ис киирбэх дьүһүннээх дьоҥҥо наадыйар.
Салгын тырааныспарын үлэһиттэрэ бигэ туруктаах хамнастаахтар, үлэ кодексатынан социальнай хааччыллыылаахтар. Кинилэри киэҥ географиялаах айан, идэ таһымын үрдэтэн үөһэ тахсан иһэр интэриэһинэй үлэ күүтэр.
Интэриэһиргээбит дьон резюмеҕытын кытта туран түспүт толору хаартыскаҕытын personal@yakutia.aero ыытаргытын күүтэллэр. Аадырыстара: 677014, Дьокуускай куорат, Быковскай уул. 9, 115 хос. Билсэр төлөпүөн: 7 (4112) 49-54-08.
«Саха сирэ», edersaas.ru