Билигин хас биирдии күн былдьаһык – дьылы быһаарар ыһыы кэмэ! Бас билии көрүҥүттэн тутулуга суох быйыл өрөспүүбүлүкэ үрдүнэн бурдук 11,1 тыһ., сүөһү сиир култуурата 27,3 тыһ. гектарга ыһыллыахтаах, хортуоппуй 8,4 тыһ., аһаҕас буорга үүнэр оҕуруот аһа 2,2 тыһ. гектарга олордуллуохтаах.
Бэс ыйын 13 күнүнээҕи чахчынан, бурдук 9,7 тыһ. (сэлиэһинэй 1,6 тыһ., ньэчимиэн 2,4 тыһ., эбиэс 5,7 тыһ.) гектарга, сүөһү сиир култуурата 15,1 тыһ. гектарга ыһылынна. Былааннарын Бүлүү, Нам, Уус Алдан, Мэҥэ Хаҥалас, Өлүөхүмэ, Сунтаар улуустара уонна Дьокуускай к. толорон иһэллэр. Оттон Амма, Хаҥалас, Чурапчы уонна Таатта улуустара графиктарыттан хааллылар. Ити биричиинэтэ биллэр – халаан содула. Аммаҕа уу 4,3 тыһ. гектар бааһынаны, ол иһигэр 1 тыһ. гектар бурдук сирин, ылбыта. Уу түһэн, сир син кууран, хаһаайыстыбалар 731 гектарга бурдугу, 77 гектарга сүөһү сиир култууратын ыстылар, 167 гектар бааһына туһатыттан тахсыбыт. Чурапчыга халаан 1 тыһ. гектары, ол иһигэр 328 гектар бурдук ыһыллыахтаах бааһынатын ылбыта. Билигин онно сүөһү сиир култууратын ыһа сылдьаллар.
Таатта улууһугар уу бааһыналары ылбытыгар эбии муосталары алдьатан, хаһаайыстыбалар («Хочо» уонна «Уолба» кэпэрэтииптэр) тиэхиньикэлэрин кыайан илдьибэккэ, ыһыыларын саҕалыы иликтэр. Ууттан босхоломмут бааһыналарга мантан сайын (от ыйын 10 күнүгэр диэри) сүөһү сиир култууратын ыһарга суоттаналлар. Наада буолар сиэмэлэрэ, уоҕурдуулара баар.
Хортуоппуй 7,5 тыһ. гектарга, аһаҕас буорга үүнэр оҕуруот аһа 1,7 тыһ. гектарга олордуллан, былырыыҥҥы көрдөрүү куоһарыллан иһэр. Тэрээһиннээх хаһаайыстыбалар хортуоппуйу 2,2 тыһ., оҕуруот аһын 481 гектарга олордубуттар.
Тыа хаһаайыстыбатын министиэристибэтин Сиртэн үүнээйини ылыыга департаменын исписэлиистэрэ ыһыы кэмигэр улуустарга тахсаннар, үлэни-хамнаһы миэстэҕэ хонтуруоллууллар, үөскүүр кыһалҕалары тута быһаараллар.
Раиса СИБИРЯКОВА, «Саха сирэ» edersaas.ru