Ыһыах алгыһа күүс эптин, санааны бөҕөргөттүн!

Ааптар: 
Бөлөххө киир:

Горнай улууһун Атамай нэһилиэгэр сарсыардаттан дьон-сэргэ уратытык сэргэхсийдэ. Ыал-ыал ахсын киирии-тахсыы элбээтэ. Алаадьы минньигэс сыта сүрэҕи-быары сылаанньытта. Арыылаах саламаат астанна.  Кыынньар кымыс ыймахтанна.

Бу үөрүүлээх, кэтэһиилээх кэрэ күн, нэһилиэк аҕа баһылыга Роман Кононович Федоров Үрүҥ Тунах ыһыаҕынан нэһилиэгин дьонун ис сүрэҕиттэн үөрэн-көтөн туран эҕэрдэлээтэ. Улуу Кыайыы 75 сылынан тыыл бэтэрээннэригэр, сэрии сылларын оҕолоругар, Бэс Күөлүгэр олорор бочуоттаах олохтоохторго туох баар үтүөнү, кэрэни баҕаран туран, ыһыах кэһиитин — үтэһэлээх эти уонна саамал кымыһы туттарда диэн атамайдар инстаграмҥа үөрүүлэрин үллэстэллэр.

Нэһилиэкпитигэр тыыл бэтэрээннэрэ, ытык-мааны дьоммут: Николай Гаврильевич Жирков,  Семен Климентьевич Федоров,  Варвара Гурьевна Иванова,  Варвара Егоровна Суханова,  сэрии сылларын оҕолоро  Савва Николаевич Алексеев, Петр Гаврильевич Варламов, Гаврил Гаврильевич Колодезников,  Георгий Васильевич Анисимов,  Акулина Павловна Петрова,  Варара Архиповна Яковлева оҕолоругар, кэнчээри ыччаттарыгар үтүө сүбэлэринэн өйөбүл буола олороллор.

Нэһилиэкпит Кыһыл кинигэтигэр  бэйэлэрин үтүө холобурдарынан,  үлэҕэ, уопсастыбаннай хамсааһыҥҥа көхтөөх кыттыыларынан,  нэһилиэк сайдыытыгар киллэрбит кылааттарынан,  Атамай Бочуоттаах олохтооҕун үрдүк чиэстээх аатын ылбыт 55 киһи сурулла сылдьар. Ол курдук, Варвара Ефимовна Ефремова, Валентина Николаевна Яковлева,  Владимир Иванович Яковлев,  Мария Егоровна (кини ийэтэ Инна Ивановна Жиркова) баһылык эҕэрдэтин туттулар уонна хардатын бэйэлэрин алгыстарын кэнчээри ыччакка тиэртилэр. 

Үрүҥ Тунах ыһыах эһиги иэйиигитин уһугуннардын,  инникигэ эрэлгитин эптин,  дьолу, этэҥҥэ буолууну бэлэхтээтин.  Биһигини барыбытын, оҕолоргутун, сиэннэргитин, хос сиэннэргитин үөрдэ-көтүтэ уһуннук, дьоллоохтук олоруҥ.  Удьуоргут дьоһуннук салҕаннын, эйэлээх олох утумнаннын. Ыһыах алгыһа күүс эптин, санааны бөҕөргөттүн, — диэн баҕа санаа бастыҥын суруйаллар.

+1
0
+1
0
+1
0
+1
0
+1
0
+1
0
+1
0