Вячеслав Штыров: «Буойас сырыыта Саха сирин социальнай-экэнэмиичэскэй сайдыытын тупсарыаҕа»
2019 сыл от ыйын 27 күнэ — бастакы пассажирдары уонна таһаҕаһы тиэйэр буойас Алдантан Аллараа Бэстээххэ тиийиитэ Саха сирэ социальнай-экэнэмиичэскэй сайдыытын устуоруйатыгар кыһыл көмүс буукубанан суруллар күнэ.
Бэҕэһээ Алдан уонна Томмот куораттарга АЯМы туппут бочуоттаах ыалдьыттар, бастакы пассажирдар уонна бу үөрүүлээх түгэни сырдатар 25 суруналыыс айанныыр бастакы буойаһын үөрүүлээхтик атаарыы сиэрэ-туома буолла. Саха сирэ бу үөрүүлээх түгэни 34 сыл күүппүтүн туһунан «Саха сирин Тимир суоллара» АХ салайааччытын 1-кы солбуйааччы Владимир Магдич бэлиэтээтэ.
Пассажирдар бастакы буойастарын атаараары туран СӨ судаарыстыбаннай сүбэһитэ Вячеслав Штыров пассажирдары уонна таһаҕаһы тиэйиигэ суол аһыллыыта Саха сиригэр өрөбөлүүсүйэ буолуутугар тэҥнээтэ.
— Ол эбэтэр таһаҕаһы тиэйиигэ кэккэ тирээн турар кыһалҕа олохтоохтук быһаарыллыаҕа. Саха сиригэр олох-дьаһах хаамыыта Өлүөнэ Эбэбититтэн олус улахан тутулуктаах. Уон биир сыл буола-буола өрүс уолар буолан, таһаҕаһы тиэйии өрүү харгыстанар. Маныаха сыаналаах сөмөлүөтүнэн эбэтэр ыарахан уйуктаах массыыналарынан эрэ таһыы кыах баар. Аны буойас сырыыта олохтонон, Саха сирин социальнай-экэнэмиичэскэй сайдыыта биллэ тупсуоҕа, тэтимнээхтик иннин диэки хардыылыаҕа. Биллэн турар, тимир суол үлэтэ Алдан оройуона сайдыытыгар саҥа тыыны биэриэҕэ. Тимир суол үлэһитин идэтэ билигин көмүсчүт идэтигэр тэҥнээх буолла. Кылаабынайа, ыччаппыт үлэлээх буолуоҕа, — диэн бэлиэтээтэ Вячеслав Штыров.
СӨ судаарыстыбаннай сүбэһитэ салгыы бу суолталаах событие Саха сирин сайдыытын устуоруйатыгар эрэ буолбакка, бүтүн Арассыыйа социальнай-экэнэмиичэскэй сайдыытыгар улахан оруоллааҕын ыйда.
— Саха сиринэн ааһар Амуурдааҕы-Саха сирин тимир суола (АЯМ) биһиги өрөспүбүлүкэбитигэр тимир суолу тутууну өссө кэҥэтэргэ кыаҕы биэрдэ. Ол курдук, тырааныспар стратегиятыгар тимир суол Аллараа Бэстээхтэн Магадааҥҥа, Усть-Куттан Ленскэйгэ, Дьокуускайга тиийэ тутуллуоҕа. Бу, омос санаатахха, остуоруйаны кэпсээһиҥҥэ тэҥнээх курдугун иһин, барыта биһигиттэн, Саха сирин олохтоохторуттан бэйэбититтэн тутулуктаах. Биһиги дьаныарбытыттан, күүстээх санаабытыттан, кэскиллээх толкуйбутун олоххо киллэрэн иһэрбититтэн, — диэн санаатын тиэртэ Вячеслав Штыров.
Елена Потоцкая.