Саас кэлэн, хаар ууллан, Дьокуускайга кыһыны быһа мунньуллубут кири-бөҕү ыраастааһын үлэтэ саҕаламмыта. Икки нэдиэлэ анараа өттүгэр, ол саҕана Дьокуускай баһылыга, билигин Ил Дархан эбээһиннэһин толорооччу Айсен Николаев, “Двор-Баттл” аахсыйа саҕаламмытын биллэрбитэ. Соторутааҕыта Губинскай уокурукка аахсыйа олус таһаарыылаахтык ыытыллан ааста. “Двор-Баттл” бырайыак туһунан “Губинскай ОДьКХ” салайар тэрилтэ генеральнай дириэктэрэ Владислав Дмитриевтыын кэпсэттибит.
— Владислав Михайлович, салайар хампаанньаҥ үлэтин туһунан кылгастык сырдыан дуо?
— Мин салайар тэрилтэм “Губинскай ОДЬКХ” диэн. Губинскай уокурук дьиэтин 80%-н хааччыйабыт. 2006 сыллаахтан тэриллэммит таһаарыылаахтык үлэлии сылдьабыт. Сыл аайы уокурукпутугар дьиэлэр элбии тураллар. Бу биһиги сыралаах үлэбит үтүө түмүгэ буолар.
— “Двор Баттл” аахсыйа Губинскай уокурукка хайдах ыытылынна?
— Дьокуускай куорат салалтата быйыл “Двор Баттл” диэн олус үчүгэй бырайыагы саҕалаата. Бырайыак сыала-соруга диэн, олохтоохтор, салайар хампаанньалар, уокурук салалталарын, тэрилтэлэр күүстэринэн куораты ыраастааһын уонна саҥардыы буолар. Бастаан Гагаринскай уокурукка ыытыллыбыта. Бу бырайыагы уокуруктан уокурукка эстафета быһыытынан бэрсэн иһэр аналлаах кубик оҥоһуллубута. Гагаринскай уокурук бэйэтин уокуругар акцияны ыытан баран, кубигы салгыы биһиэхэ биэрбитэ. Аахсыйа чэрчитинэн, ыраастааһын, кырааскалааһын уонна көҕөрдүү үлэтин ыыттыбыт. Үксүн быылы таһаарар кумаҕы ыраастаатыбыт. Бастакы куорпус таһыгар күрүө туттубут, яблоня олортубут. Үс сыллааҕыта олордубут яблонябыт этэҥҥэ үүнэ турар.
— Олохтоох нэһилиэнньэ төһө көхтөөхтүк кытынна?
— Бырайыак саҥа саҕаланан эрэр диэтэххэ, нэһилиэнньэ төһө кыалларынан кытынна. Ол эрэн, кэнники сылларга өссө да элбэх киһи кыттыыны ылыа диэн эрэнэбит. Быйыл үксүн салайар хампаанньа, управа үлэһиттэрин, тэрилтэлэр уонна уопсастыбыннас күүһүнэн буолла. “Двор Баттл” бырайыак сайдан истэҕин аайы дьон-сэргэ өссө көхтөөх буолуоҕа.
— Аахсыйаны хайдах салгыахха сөбүй?
— “Двор Баттл” уокуруктарга барытыгар ыытылыннаҕына, мэрия түмүк таһаарар. Эстафетаны ыытан иһэр кубик Дьокуускай уокуругун барытын кэрийдэҕинэ, аны дьиэ таһын ырааһыгар күрэхтэһии ыытыахха сөп. Бу бырайыагы тохтотуо суохтаах.
— Өссө ханнык тэрээһиннэри ыытаҕытый?
— Биһиги уокурукпут бэтэрээннэр уокуруктара буолар. Кыайыы күнүн инниттэн дьиэлэр тастарын ыраастааһын, подъезтары оҥоруу үлэтэ ыытыллыбыта. Ол иһин “Двор Баттл” бырайыакка бэлэм этибит. Улахан бөх да диэн суоҕа. Бэтэрээннэргэ анаан, олорон сынньанар сир оҥорбуппут, кэлин бүрүөһүннүөхпүт. Бэйэбит испитигэр саамай үчүгэй “дьиэ таһа”, “балкон”, “сквер” диэн номинацияларга кыайыылаахтары талан куорат күнүгэр эҕэрдэлиибит. Олохтоохтор көхтөөхтүк кытталлар. Холобура, 202 микрорайон 19-с куорпуһун олохтооҕо, Ираида Старостина балконун олус үчүгэйдик тупсаҕайдык сибэкки олордон киэргэтэр. Бу сыл эмиэ сибэккилэрин олорто. Уонна сыл аайы, хомунаалынай төлөбүрү кэмсигэр суобастаахтык төлүүр киһини талан эҕэрдэлээччибит. “Мөлүйүөн сибэкки” аахсыйанан сыл аайы сибэкки олордобут.
— Подъездтары өрөмүөннээһин үлэтэ ыытыллыа диэн мээрийэ иһитиннэрбитин туох дии саныыгын?
— Ити боппуруоска биһиги бэйэбит этиилээхпит. Сокуон этэринэн, подъездтары өрөмүөннүүр харчыны олорор дьон бэйэлэрэ уйунуохтаахтар. Ол эрэн, кырааскалааһын үлэтэ олус сыаналаах. Дьон кыайан уйуммат. Ол иһин, Подмосковье эрэгийиэннэр гыммыттарын курдук, куорат бүддьүөтүттэн эбии харчы көрдөрөн, олохтоохторго подъездтарын өрөмүөннэтэргэ тарыыбы аччатар курдук этии киллэрбиппит. Айсен Николаев ити этиини өйөөбүтэ. Бэйэбит күүспүтүнэн 88 подъеһы өрөмүөннүүр былааны туруоруннубут. Оттон этиибит олоххо киирдэҕинэ эбии 36 подъезд оҥоһуллуо.
— “Двор Баттл” курдук бырайыактар сайда туралларыгар туох баҕа санаалаххыный?
— Маннык бырайыактары биһиги толору өйүүбүт. Куораппыт тупсаҕай көстүүлэнэригэр олохтоохтор төһүү күүс буолаллар. Кинилэр биһиги үлэбитин өйөөн, көмө буоллахтарына куораппыт, олорор уокурукпут сайдыа-тупсуо.
-Владислав Михайлович хоруйдарыҥ иһин махтал, үлэҕэр ситиһиилэри баҕарабыт!
-Махтал!
edersaas.ru