Бырабыыталыстыба бэрэссэдээтэлин солбуйааччы Ольга Балабкина киэһээҥҥи брифиҥҥэ тахсан коронавирус тула уопсай балаһыанньаны иһитиннэрдэ.
edersaas.ru
Кини чуолаан, дьаҥ турбут кэмигэр волонтердар хамсааһыннара үгүс үлэни оҥорон, социальнай үлэһиттэри кытта тэҥҥэ инники күөҥҥэ сылдьалларын бэлиэтээтэ. Волонтер хамсааһынын ыччата идэлэрин талыыга бастакы хардыылара диэн хайҕаата.
Өрөспүүбүлүкэ үрдүнэн 11 лаборатория үлэлиирин, күннэтэ 3000 тест оҥоһулларын иһитиннэрдэ. Уустук кэмҥэ хааччахтаныы ирдэбилин сиэрдээхтик толордохпутуна эрэ дьаҥы кыайыахпытын сөбүн эттэ. Быраастар үтүө суобастаах үлэлэрин түмүгэр дьаҥҥа ылларбыт аҕам саастаахтар үтүөрэллэрин бэлиэтээтэ. Хомойуох иһин, бүтэһик сууккаҕа биир киһи олохтон туораабытын эттэ. Тоһоҕолоон Өлүөхүмэ оройуона дьаҥтан харыстаныы ирдэбилин тутуһалларыгар туһаайда.
Өрөспүүбүлүкэ обсерватордарыгар 507 462 киһи эрийэн сибээскэ тахсыан сөбүн иһитиннэрдэ.
Ульяна Захарова, edersaas.ru