Коронавирус дьаҥа тарҕаныытын сэрэтэр уонна бохсор дьаһаллар чэрчилэринэн, өрөспүүбүлүкэҕэ волонтердар хамсааһыннара тэриллэн үлэлиир.
edersaas.ru.
Аһыныгас санаалаах эдэр дьон бэйэни изоляцияланыы эрэсиимигэр, дьиэлэригэр хаайтаран олорор сааһырбыт дьоҥҥо көмөлөһөллөр. Ол курдук, инбэлииттэртэн уонна кырдьаҕастартан сайаапка хомуйан, маҕаһыынтан ас-үөл ылан биэрдилэр, ону таһынан ыттарын салгыҥҥа дьаарбаталлар. Биир маннык хамсааһын Бүлүү улууһугар баар.
– Биһиги “Саха Өрөспүүбүлүкэтин сиригэр-уотугар үрдүк бэлэмнээх буолуу эрэсиимин киллэрии уонна коронавирус саҥа сыстыганнаах ыарыыта тарҕаныытын бохсуу дьаһалларын туһунан” диэн Ыйаах тахсаатын кытары тэриллэн үлэлии сылдьабыт, – диир волонтердар улуустааҕы штабтарын салайар Гаврил Архангельскай. – Бүгүн 66 волонтер баар. Сайаапканы инбэлииттэртэн, соҕотоҕун олорор сааһырбыт дьонтон уонна тыыл, үлэ бэтэрээннэриттэн хомуйабыт.
Бастаан сарай хаарын түһэриигэ, мууһу булууска угууга, олбуортан хаары таһыыта үлэлээбиппит. Билигин аһы-үөлү, докумуоннары, эми-тому атыылаһаммыт дьиэлэригэр илдьэн биэрэбит. Билиҥҥи туругунан 222 сайаапка киирэн, толорулунна. Волонтердарбыт күннэтэ эбиллэ тураллар, билигин 85 волонтердаахпыт.
Кинилэр кэккэлэригэр Бүлүүтээҕи педагагоческай кэллиэс устудьуоннара, оскуолалар, тэрилтэлэр үлэһиттэрэ бааллар. Үтүө хамсааһыны өйөөн, улуус дьаһалтата массыынаны биэрэн, онон сылдьабыт. Түөрт массыына сыһыарыллыбытыттан сайаапканан төһө элбэх киирэринэн көрөн сүүрдэбит.
Раиса Сибирякова, «Саха сирэ» edersaas.ru