Афанасий Владимиров: «Олох хаамыытынан, сайдыытынан Төрүт Сокуоммут да саҥатытыллан иһэрэ, мин санаабар сөп»

Төрүт Сокуоҥҥа уларытыылары киллэрэр куоластааһын туһунан Мэҥэ Хаҥалас улууһун Ороссолуода нэһилиэгин олохтооҕо, үлэ, спорт бэтэрээнэ Афанасий Владимиров санаатын үллэстэр:

– Бу Конституция социальнай харысхал өттүгэр үчүгэй өрүттэрдээх көннөрүүлэри киллэрбит дии саныыбын. Киһи туһугар, олоҕо туруктаах буоларыгар. Ол курдук мэдиссиинэ, үөрэх да эйгэлэригэр саҥа сүүрээннэр баар буолуох курдуктар.

Уопсайынан, олох хаамыытынан, сайдыытынан Төрүт Сокуоммут да саҥатытыллан иһэрэ, мин санаабар сөп. Улахан, элбэх омугу түмэн олорор судаарыстыба сүрүн сокуона норуотун туһугар үлэтин бириэмэ көрдөрүө диэн бигэ эрэллээхпин. Оҕолорбут, сиэннэрбит бу ылыныллар Төрүт Сокуонунан тирэҕирэн үүнүү, сайдыы суолун тэлэн, уйгулаах олоҕу тутар инникигэ эрэллээх, бигэ көмүскэллээх, дойдуларыгар бэриниилээх дьон буола үүнэ-сайда туралларыгар баҕарабын.

Иван Ксенофонтов, «Саха сирэ» хаһыат, edersaas.ru