Владимир Солодов уонна Алексей Иннокентьев Ньурба улууһун сайдыытын кэпсэттилэр
Ньурба улууһун социальнай-экэнэмиичэскэй сайдыытын туһунан боппуруостары СӨ бырабыыталыстыбатын бэрэссэдээтэлэ Владимир Солодов уонна улуус баһылыга Алексей Иннокентьев ахсынньы 24 күнүгэр ырыттылар.
Алексей Иннокентьев бэлиэтииринэн, Дьокуускайга нэдиэлэ анараа өттүгэр АЛРОСА хампаанньа финансовай-хаһаайыстыбаннай үлэтин түмүгүн барыллаан көрүүтүгэр Ньурба улууһун кытта бииргэ үлэлииргэ сөбүлэһии түһэрсибиттэр. «Биһиги олохтоохторбут алмааһы хостуур хампаанньаҕа контролерунан, сепараторщигынан, суоппарынан үлэлиэхтэрэ. Суоппар буолаары сылдьар дьон «БЕЛАЗ» ыытарга Мирнэйгэ АЛРОСА каадырдары бэлэмниир киинигэр үөрэнэ сылдьаллар. Билигин олохтоохтор Ньурбатааҕы лиссиэйгэ үөрэнэллэрин туһунан хампаанньалыын кэпсэтии ыытабыт. Оччотугар Мирнэйдээҕи киинтэн преподавателлэр кэлэн үөрэтиэхтэрэ этэ», — диир улуус баһылыга.
Владимир Солодов бу боппуруоһу быһаарарга көмөлөһүөх буолла. Лиссиэйгэ Ньурба олохтоохторо эрэ буолбакка Бүлүү бөлөх улуустарыттан эмиэ кэлэн үөрэнэллэрэ буоллар диэн бырабыыталыстыба бэрэссэдээтэлэ санаатын эттэ.
Көрсүһүү кэмигэр улууска барыахтаах тутуулары — норуот айымньытын дьиэтин уонна оҕо саадын туһунан кэпсэттилэр. Бу уонна атын тутуулар туһунан Владимир Солодов Ньурбаҕа кэллэҕинэ кэпсэтиэх, тутуу үлэтин көрүөх буолла, манна эбии улуус сайдыытын стратегиятын ылыналларыгар эттэ.
edersaas.ru