Бүгүн саха бастакы лингвист-учуонайа, сахалыы алпаабыт, бастакы букубаар ааптара Семен Андреевич Новгородов төрөөбүт күнүгэр Төрөөбүт тыл уонна сурук-бичик күнэ бэлиэтэнэр.
edersaas.ru
СӨ бырабыыталыстыбатын бэрэссэдээтэлэ Владимир Солодов бу күннэргэ Чурапчы улууһугар Семен Новгородов аатынан оскуолаҕа сылдьыбытын туһунан инстаграмҥа бэйэтин страницатыгар кэпсээтэ. Итиэннэ Иван Гоголев «Сахалыы саҥарабын» диэн хоһоонун сахалыы ааҕан иһитиннэрдэ.
Владимир Солодов «Саха сирэ» хаһыакка биэрбит интервьютугар саха тылын үөрэтии туһунан маннык этэн турар: «Хомойуох иһин, баҕарбытым курдук түргэнник үөрэтэр табыллыбат. Саха тылын уруоктарын ылабын, ол эрэн, бириэмэ олох тиийбэт. Ол эрээри, тыл этэрбэр бэлэмнэнэрбэр, улуустарга барарбар хас да саҥа этиини үөрэтэбин. Тылы билэр дьон миэхэ көмөлөһөллөр. Кыралаан да буоллар, инним диэки сыҕарыйыы баар. Бастакы сүрүн соругум – сахалыы саҥаны өйдөөһүн. Саха классиктара — Былатыан Ойуунускай, Өксөкүлээх Өлөксөй айымньыларын аахпытым. Соторутааҕыта Семен Данилов айымньыларын кытта билистим. Кини төрөөбүт дойдутугар Мытаахха бара сылдьыбытым. Ол онно миэхэ Семен Петрович хомуурунньугун бэлэхтээбиттэрэ. Наһаа үчүгэй хоһооннордоох эбит. Маны таһынан, фронтовик Тимофей Сметанин кэпсээннэрин аахпытым. Егор Чээрин Александр Твардовскай Василий Теркинын санатта. Өксөкүлээх “Ойуун түүлэ” олох ураты айымньы эбит диэн бэлиэтиэм этэ. Инникини олох сөпкө өтө көрбүт, сабаҕалаабыт эбит. Аныгы тылынан форсайт диэн баар буоларын билгэлээбит эбит. Бу омук тылын суолтата инникини былааннааһын, сабаҕалааһын диэн буолар. “Саха интэлигиэнсийэтигэр” суругун эмиэ аахпытым», — диэн этэн турар.