Олунньу 9-10 күннэригэр СӨ бырабыыталыстыбатын бэрэссэдээтэлэ Владимир Солодов салайааччылаах бөлөх Чурапчы улууһугар сырытта. Бөлөххө СӨ Тыа хаһаайыстыбатын миниистирэ Александр Атласов, СӨ Үөрэҕин уонна наука миниистирин 1-кы солбуйааччы Ирина Любимова сырыттылар. Кинилэри сэргэ Ил Түмэн дьокутааттара Михаил Гуляев, Павел Пинигин, Семен Никитин кыттыыны ыллылар.
edersaas.ru, Елена МАКАРИНСКАЯ, Сэмэн ЖЕНДРИНСКЭЙ
Бастаан Одьулууннааҕы Чурапчы коллеһын баазатыгар сырытыннаран, араас хабааннаах бырайыактары билиһиннэрдилэр. Улуус баһылыга Андрей Ноговицын Владимир Викторовичка Одьулуун тыатын хаһаайыстыбатын, Болугур оҕуруот аһын үүннэриигэ ситиһиилэрин, Чурапчы, Мугудай уһуйааннарын оҕону сайыннарыыга, Арыылаах орто оскуолатын саҥа технологияҕа инники хардыыларын кэритэ сылдьан көрдөрдө.
Күн иккис аҥаарыгар үлэлиир бөлөх Хатылы нэһилиэгин Көһөрүллүү түмэлигэр сырытта, Сылаҥ оскуолатыгар “Смарт-среда в условиях сельской местности” диэн бырайыагын кытта билистэ.
Салгыы Прокопий Сокольников аатынан улуустааҕы киин балыыһаны кэрийэн көрдө уонна салалтаны, үлэһиттэри кытта көрүстэ. Балыыһа уонна улуус дьаһалтата улууспут саамай сытыы боппуруоһун — таас балыыһабыт иккис уочаратын туруоруста. Владимир Викторович бу сылга бырайыактаан, экспертизаны ааһан, эһиил балыыһа тутуутун бырагыраамаҕа киллэрэргэ диэн эттэ.
Сэмэн Новгородов аатынан Чурапчы орто оскуолатыгар сылдьан, эбии оҥоһуллубут кылаастары көрдө. “Беркут” байыаннай-патриотическай кулууп иитиллээччилэрэ Патриотизм сылыгар анаммыт көрдөрүүлэрин Владимир Солодов астына көрдө. Оскуола дириэктэрэ Надежда Уарова үөрэх хаачыстыбатын, ситиһиилэрин билиһиннэрдэ, оҕо ахсаана элбэҕинэн икки сменанан үөрэнэллэрэ кыһалҕалааҕын ыйда. Владимир Викторович саҥа оскуолалары тутуу уонна хаарбах туруктаах оскуолалары туоратыы сүрүн миэстэҕэ туралларын бэлиэтээн туран, иккис сменаны туоратыыны өрөспүүбүлүкэ таһымыгар эмиэ сүрүннүүр суолтаҕа ууруохпут диэтэ.
Киэһэ өттүгэр “Чурапчы” ТХПК үлэтин-хамнаһын, бородууксуйатын уонна Чурапчытааҕы физкултуура уонна спорт үнүстүүтүгэр сырытта.
Олунньу 10 күнүгэр Владимир Солодов сарсыардатын Чурапчытааҕы гимназияттан саҕалаата. Кини гимназия 312 үөрэнээччитин, 46 учууталын кытта Арассыыйа гиимин толордо.
Салгыы ЧГИФКСИ устудьуоннарын саҥа уопсайыгар киирэр үөрүүлээх дьаһалларыгар кыттан, аалай кыһыл лиэнтэни быста. Саҥа уопсай 200 миэстэлээх, 100 аһыыр миэстэлээх. Үөрүүлээх чааска ректор Иннокентий Готовцев, бастакы ректор Михаил Гуляев, Ил Түмэн дьокутаата Павел Пинигин, улуус баһылыга Андрей Ноговицын эҕэрдэ тылы эттилэр, Саха Өрөспүүбүлүкэтин Ил Дарханыгар, бырабыыталыстыбаҕа, Владимир Солодовка махтаннылар. Уопсайы туппут “Кинг-95” ХЭТ дириэктэрэ Сос Варжапетян дьиэ күлүүһүн символын ректор Иннокентий Готовцевка туттарда. Тутуу министиэристибэтин бочуотунай грамотатын рекреация кафедратын сэбиэдиссэйэ Петр Гуляев, махтал суругун АХЧ проректора Александр Агафонников Бырабыыталыстыба бэрэссэдээтэлин Владимир Солодов илиититтэн туттулар.
Бу кэнниттэн Владимир Солодов “Айылгы” Култуура киинигэр бырабыыталыстыба отчуотун ыытта.
Елена МАКАРИНСКАЯ, Сэмэн ЖЕНДРИНСКЭЙ. Ааптардар хаартыскаҕа түһэриилэрэ.