Бэс ыйын 20 күнүгэр Арассыыйа бэрэсидьиэнэ Владимир Путины кытта быһа сибээс олохтонуоҕа. Быһа эфири “Бастакы”, “Россия 1”, “Россия 24”, НТВ уонна ОТР теле-ханаалларынан көрүөххэ, “Маяк”, “Вести FM” уонна “Радио России” араадьыйа ыстаансыйаларынан истиэххэ сөп. Бүгүҥҥү күҥҥэ 700 тыһыынча ыйытыы киирдэ.
Ыйытыылары ылыы суукканы эргиччи ыытыллар. РИА Новости иһитиннэрэринэн, үгүстэр төлөпүөнүнэн ыйыппыттар, сорохтор СМС, moskva-putinu.ru көмөтүнэн. Төрдүс миэстэҕэ – социальнай ситимнэр, бэһискэ — moskva-putinu.ru сайт. СИА бу порталга киирбит ыйытыылары кылгастык ырытта.
Саха сириттэн киирбит ыйытыыга иһинээҕи рейстэргэ үөһэнэн көтүү билиэтин сыаната ыарахана ахтылынна. Уһук Илин олохтоохторун Арҕаа Сибииртэн уонна Уһук Илинтэн нэһилиэнньэ барыытын кыһалҕатын быһаарыыга быһаччы үлэ хаһан саҕаланара долгутар.
Белгород олохтоохторо сыл аайы хомунаалынай өҥө тарыыба, гаас уонна уот үрдүөхтээх диэн ким быһаарбытын туоһулаһаллар. Нэһилиэнньэ социальнай көмүскэлигэр сыһыаннаан, дьон эргэ дьиэлэргэ 6 бырыһыаннаах ипэтиэкэ киирэрин туруорсаллар. “Үһүс уонна онтон элбэх оҕоломмут ипэтиэкэлээх ыалларга хаһан 450 тыһыынча солкуобайы төлүүргэ аныахтарай?”, — диэн сайтка суруйбуттар.
Экология туһугар долгуйан бөҕү тиэйии реформата олоххо мөлтөхтүк киирэрин ыйаллар. Эминэн хааччыйыыга эмиэ ыйытыылар киирэллэр.
Бэрэсидьиэн тус олоҕор сыһыаннааҕы эмиэ ыйыталлар. Ол курдук, бэрэсидьиэн буолар төһө ыараханын, уус-уран литератураны ааҕарга бириэмэ ордорун дуу, суоҕун дуу интэриэһиргииллэр.
Санатан эттэххэ, бэрэсидьиэни кытта былырыын 4,5 чаас устата барбыт кэпсэтиигэ 2 мөл тахса ыйытыы киирбитэ.
Наталия Чемашкина.