Владимир Путин: «Аграрийдары өйүөххэ!»
Олох-дьаһах

Владимир Путин: «Аграрийдары өйүөххэ!»

Дойду Бэрэсидьиэнэ бэҕэһээ видеокэмпириэнсийэ киэбинэн ыыппыт мунньаҕын тыа хаһаайыстыбатын уонна астыыр-таҥастыыр салаа эйгэтин боппуруостарыгар туһаайда.

edersaas.ru

Мунньаҕы саҕалыырыгар Владимир Путин Арассыыйа агропромышленай комплекса кэлиҥҥи сылларга бары салаанан үрдүк көрдөрүүлэри ситиһэрин, саҥа технологиянан сэбилэнэн эрэрин бэлиэтээтэ. Ас-үөл сүрүн көрүҥүнэн дойду бэйэтин хааччынар итиэннэ кэлиҥҥи алта сыл устатыгар сыллата 100 мөл. туонна бурдук хомуллар, быйыл эмиэ куһаҕана суох үүнүү кэтэһиллэр диэтэ. Коронавирус дьаҥыттан сылтаан төһө аан дойду да, Арассыыйа да экономикаларыгар судургута суох кэм тосхойдор, тыа хаһаайыстыбатын үлэһиттэригэр тэтими ыһыктыбат сорук турарын эттэ.

Билигин биһиги хампаанньаларбыт иннилэригэр аһыллар кыахтары туһанар, сыаналыыр итиэннэ бэйэ оҥорор бородууксуйатынан ис ырыынагы эрэллээхтик хааччыйар уонна экспортка таһаарар сыал турар. Экспертар этэллэринэн, тыа хаһаайыстыбата, астыыр-таҥастыыр промышленность коронавирус дьаҥыттан ылыллыбыт хааччахтыыр дьаһалларга оҕустарыылара этэмэт курдук эрээри, дохуот намтааһына уонна ороскуот үрдээһинэ манна да баар. Онон аграрийдары өйүүр итиэннэ билигин, сааскы ыһыы үлэтин кэмигэр, кинилэр оттугу-уматыгы, уоҕурдууну итиэннэ сырьену атыылаһалларыгар көмөлөһөр наада, – диэтэ Владимир Путин. 

Александр Атласов, Саха Өрөспүүбүлүкэтин тыатын хаһаайыстыбатын миниистирэ:

Тыа хаһаайыстыбатын министиэристибэтэ күннэтэ соҕотуопкалыыр, астыыр-үөллүүр эйгэҕэ мониторинг ыытар. Бары хампаанньалар, тэрилтэлэр, хаһаайыстыбалар коронавирус дьаҥынан сибээстээн, хааччахтыыр миэрэлэри толору тутуһаннар, үлэлии-хамсыы олороллор, нэһилиэнньэ наадыйыытын хааччыйаллар. Үгүс тэрилтэлэр аһы-үөлү дьиэҕэ тиэрдэн биэрии өҥөтүн тэрийдилэр, ону таһынан быраастарга, кырдьаҕастарга уонна кыра дохуоттаах ыалларга босхо аһылык нобуорун биэрэллэр.

Үүт соҕотуопкатын үлэтэ көхтөөх, сорох улуустар кыбартааллааҕы былааннарын аһары толордулар. Соҕотуопкалыыр-астыыр кэпэрэтииптэр бэйэлэрин улуустарын хааччыйбыттарын таһынан, бородууксуйаларын киин куоракка аҕалаллар. Батарыыга мэһэй суох, сыана үрдээбэтэ. Билигин хаһаайыстыбалар сайылыкка тахсан эрэллэр. Быйыл сайылыкка 38,3 тыһ. сүөһү, ол иһигэр 17,5 тыһ. ыанар ынах (ыанньык 27,8 %-а) таһаарыллыа. Онон, бородууксуйа көрүҥэ уонна кээмэйэ лаппа элбэтиллиэҕэ. Ааспыт сылларга куорат болуоссаттарыгар «Өрөбүл күн дьаарбаҥкалара» тэриллэллэрэ, ону пандемия аастаҕына, сөргүтүөхпүт, мэрия сөбүлэҥин биэрэн турар.

Сааскы ыһыы үлэтин туһунан эттэххэ, бурдук 9 379 гектарга, сүөһү сиир култуурата 30 283 гектарга ыһыллыахтаах, хортуоппуй 7 583 гектарга, оҕуруот аһа 1 778 гектарга олордуллуохтаах. Сөп буолар сиэмэ, уоҕурдуу, уматык баар. Бүддьүөттэн 202,1 мөл. солк көрүллүбүтүттэн, 154 мөл. солк. тиэрдиллибитэ, ордуга бу ый бүтүүтэ ыытыллар. Халаан этэҥҥэ ааста, күн-дьыл да бэрт. Хаһаайыстыбалар ыһыы үлэтин саҕалаатылар. Онон, туруоруллубут сорудаҕы толорорго эрэнэбит.

Раиса Сибирякова, «Саха сирэ» хаһыат, edersaas.ru

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

15 + девять =