Владимир Лонгинов аата саха алмааһыгар иҥэрилиннэ

Бөлөххө киир:

Үбүлүөйдээх Кыайыы күнүгэр 95 карааттаах саха алмааһыгар Сэбиэскэй сойуус Дьоруойа Владимир Лонгинов аата иҥэриллибитин туһунан СӨ Ил Дархана Айсен Николаев иһитиннэрии оҥордо.

edersaas.ru

Владимир Лонгинов 1919 сыллаахха Уус Алдан оройуонун Танда бөһүөлэгэр төрөөбүтэ. Сэрии иннигэр финансиһынан Томпо сэлиэнньэтигэр үлэлээбитэ. 1941 сыллаахха аармыйаҕа Дьокускайдааҕы военкоматынан ыҥырыллыбыта.

Владимир Лонгинов Воронежскай фронт 47-с аармыйатын 722-с стрелковой полкатын, 206 стрелковой дивизия пулеметнай расчетун хамандыыра. Украина Воронеж куоратын босхолооһуҥҥа кыттыбыта.

Владимир Лонгиновка Сэбиэскэй Сойуус Дьоруойун аата 1943 сыллаахха алтынньы 25 күнүгэр иҥэриллибитэ. Ленин уордьанынан наҕараадаламмыта. 1943 сыллаахха өстөөҕү кытары сэриигэ сэтинньи 18 күнүгэр дьоруойдуу охтубута. Черкасскай уобалас Каневскай оройуонун Пшеничники сэлиэнньэҕэ бырааттыы көмүүгэ В.Д. Лонгиновка пааматынньык туруоруллубута.

Кини аатынан Уус Алдан улууһун Бороҕон сэлиэнньэтигэр уонна Танда бөһүөлэгэр уулуссалар ааттаммыттара, пааматынньыктар туруоруллубуттара, Бээрийэ оскуолатыгар мемориальнай дуоска ыйаммыта. Маны сэргэ, Дьокуускай куорат биир уулуссата Владимир Лонгинов аатын сүгэр.

Бүгүҥҥү өрөгөйдөөх, үбүлүөйдээх Улуу Кыайыы 75 сылын бэлиэтиир күммүтүгэр “АЛРОСА” хампаанньа уонна СӨ Ил Дархана Айсен Николаев, өрөспүүбүлүкэ салалтата биир дойдулаахпыт Владимир Лонгинов аатын үйэтитэр бырайыактара биһиэхэ, уус алданнара, ураты суолталаах.

«Саха сирэ» хаһыакка, edersaas.ru саайтка анаан Наталья ПОПОВА.

+1
0
+1
0
+1
0
+1
0
+1
0
+1
0
+1
0