Ярыгин турнирыгар хамаанда төһө бэлэмнээҕин кылаабынай тренер Владимир Кириллинтан ыйыталастыбыт

Тохсунньу 27-29 күннэригэр Красноярскайга үгэс быһыытынан тустууга Иван Ярыгин аатынан норуоттар икки ардыларынааҕы Гран-при турнир ыытыллыаҕа. Спортивнай сылы саҕалыыр бу улахан эппиэттээх күрэхтэһиигэ Саха сирин хамаандата хайдах бэлэмнэммитин туһунан кылаабынай тренер Владимир Кириллин санаатын үллэстэр.

Петр Павлов, «Саха сирэ» хаһыат, www.edersaas.ru
— Үөрэтэр-эрчийэр түмсүүбүт түмүктэнэн эрэр, — диир Владимир Николаевич. – Бэнидиэнньиккэ өссө бүтэһик дьарыгы ыытыахпыт уонна оптуорунньукка айанныыбыт. Уопсайа, Россия хамаандатын састаабыгар 11 бөҕөспүт кыттар, ону таһынан эбии эдэр уолаттары киллэрэргэ федерацияҕа сайаапка түһэрбиппит. Онон Иван Ярыгин турнирыгар барыта хас киһи кыттарын Красноярскайга тиийэн баран биирдэ быһаарсыахпыт.
Бөҕөстөр уопсай туруктара арыый да үчүгэй курдук. Билигин даҕаны саппаас күннэрдээхпит. Күрэхтэһии бэйэтин тыҥааһына уонна ыгааһына спортсменнары турукка киллэрэн биэрээччи. Ылан көрдөххө, бөҕөстөр бары этэҥҥэлэр. Ыйааһын түһэриитин бэнидиэнньиктэн саҕалыахтара.

— Сүрүн утарсыыны ханнык хамаандалар оҥоруохтарай дии саныыгын?
-Бары күүстээхтэр, мөлтөхтөр кыттыбаттар. Биһиги эмиэ киирсэргэ бэлэммит. Бүгүҥҥү күҥҥэ туох баарбытынан киирсиэхпит. Кыайыыга дьулуурбутун көрдөрүөхтээхпит.

— Владимир Николаевич, кэнники сылларга Ярыгин турнирыттан кураанах кэлэ иликкит. Бу да сырыыга мэтээллэргэ суоттанар буоллаххыт?

— Оччо-бачча мэтээл ылыахпыт диэн билигин этэр кыаҕым суох. Ол күҥҥэ, ол чааска ким бэйэтин-бэйэтэ бэлэмнээн тиийбит, уопсай туругун хайдах аҕаларыттан тутулуктаах буолуоҕа. Ол да буоллар, бөҕөстөр бары эрэллээхтик тустуохтара дии саныыбын. Уонна онно эрэнэбин.

— Эдэрдэртэн хамаандаҕа кимнээх киирдилэр?

— Россия спортивнай тустууга федерациятын испииһэгинэн Европа эдэрдэргэ күрэхтэһиитин кыайыылааҕа Георгий Окороков киирэн биэрдэ. Биллэрин курдук, Ярыгин турнирыгар ситиһиилээхтик кыттыбыттар – Европа чөмпүйэнээтигэр уонна аан дойду кубогар кыттар быраабы ылаллар. Ону тэҥэ, олунньуга 23-гэр диэри саастаахтарга Россия күрэхтэһиитэ ыытыллыахтаах. Онно бастаабыттар бэйэлэрин саастыылаахтарыгар Европа күрэхтэһиитигэр кыттыахтара. Онон Красноярскай көбүөрүгэр хас биирдии бөҕөс тус сыаллаах-соруктаах тустуоҕа. Тренердэр бары даҕаны оннук былааннаахтар. Биһиги да салалтаны кытта биир санааҕа кэлбиппит. Ол иһин эбии испииһэккэ сүрүннээн эдэр уолаттары киллэрэ сатыыбыт.

—Түмүккэ тустууну таптааччыларга тугу этиэххин сөбүй?

— Бары түмсүүлээх буолуоххайыҥ, кыайыы да буоллун, хотторуу да буоллун, өрүү бары бииргэ буолуохха. Ол биһиэхэ инники улахан түһүлгэлэргэ ситиһиилээхтик кыттарбытыгар күүс-көмө буолуоҕа.

— Владимир Николаевич, хоруйуҥ иһин махтал! Үлэҕитигэр ситиһиилэри! Этэргэ дылы, илии тутуурдаах, өттүк харалаах кэлэргитигэр баҕарабыт.

Ярыгин турнирыгар Россия тустууга федерациятын ирдэбилин быһыытынан киллэриллибит бөҕөстөр:
57 кг Арыйаан Тютрин, Ньургун Александров, Георгий Окороков, Эдуард Григорьев.
61 кг Егор Пономарев, Виктор Рассадин, Ньургун Скрябин, Вячеслав Ефремов.
65 кг Виктор Степанов, Константин Власов.
70 кг Тимур Николаев.
97 кг Евгений Коломиец.

Петр Павлов, «Саха сирэ» хаһыат, www.edersaas.ru