Ил Дархан Айсен Николаев бырабыыталыстыба бэрэссэдээтэлин, кини солбуйааччыларын уонна тутаах миниистирдэр кандидатураларын Ил Түмэҥҥэ киллэрдэ.
«Саха сирэ» хаһыат
Биллэр ааттары сэргэ сонун кандидатуралар эмиэ бааллар.
Санатан эттэххэ, Саха сирин Төрүт Сокуонунан премьер, вице-премьердэр уонна биэс министиэристибэ салайааччылара хайаатар да дьокутааттар сөбүлэҥнэрин ылыахтаахтар. Онон сокуон быһыытынан, Ил Дархан Ил Түмэҥҥэ бу үөһээ ааттаммыт үрдүк сололорго кимнээҕи аныырын сөбүлэһиннэриэхтээх.
Ол курдук, бэрэссэдээтэл дуоһунаһыгар Владимир Солодовы көрөрүн биллэрдэ. Владимир Викторович премьер э.т. үлэлээбитэ төрдүс ыйыгар барда. Кини манна кэлиэн иннинэ Уһук Илин федеральнай уокурукка РФ бэрэсидьиэнин бэрэстэбиитэлин солбуйааччынан үлэлии сылдьыбыта. Бэйэтэ Москваттан төрүттээх. Москватааҕы судаарыстыбаннай университекка үөрэммитэ уонна онно аспирантураны бүтэрбитэ. Политическэй наука кандидата. Саха сирин кытары 2015 с. Юрий Трутневка солбуйааччынан ананыаҕыттан билсэр.
Ил Түмэн сөбүлэҥин аастахтарына, бастакы вице-премьердэринэн Алексей Колодезников уонна Алексей Стручков буолуохтара. Алексей Засимович олбоҕуттан хамсаабатах буоллаҕына, Алексей Александрович “Якутскэнерготтан” бу сайыҥҥыттан кэлэн үлэлиир. Кини эрдэ икки төгүл бастакы вице-премьеринэн, экономика миниистиринэн, РФ бэрэсидьиэнигэр Саха сирин бастайааннай бэрэстэбиитэлинэн үлэлии сылдьыбыта.
Бу сайын Айсен Сергеевич Ольга Балабкинаны уонна Денис Белозеровы бырабыыталыстыба бэрэссэдээтэлин солбуйааччыларын э.т. анаабыта. Ольга Валерьевна Ил Түмэҥҥэ вице-спикеринэн үлэлии олорбута. Оттон Денис Георгиевич бу саас экономика миниистиринэн анаммыта. Бу иннинэ Дьокуускайдааҕы килиэби оҥорор кэмбинээт генеральнай дириэктэринэн үлэлии сылдьыбыта.
Өскөтүн бу икки киһи кандидатурата эрдэттэн биллэр буоллаҕына, үһүс вице-премьер дуоһунаһыгар Кирилл Бычков ааттаммыта соһуччу буолла. Кини кимий? Кирилл Евгеньевич Москва уобалаһын сайдыытын корпорациятын салайар. Москва уобалаһын бырабыыталыстыбатын бэрэссэдээтэлин солбуйааччынан, “Black Swan Capital Partners Limited” хампаанньа управляющайынан, «Стройтрансгаз» ААУо дириэктэрин солбуйааччынан, Тверь уобалаһын губернаторын солбуйааччынан, эрэгийиэн сайдыытын департаменын салайааччытынан, Украинаҕа экономика сайдыытын миниистирин сүбэһитинэн үлэлии сылдьыбыт. Бэйэтэ 1974 с. Москваҕа төрөөбүт. Москватааҕы норуоттар икки ардыларынааҕы сыһыан судаарыстыбаннай институтун үөрэнэн бүтэрбит. Үөрэҕин бүтэрэн баран, «НК «Сиданко» ААУо, “Cargill International”, «Гео-Альянс» курдук хампаанньаларга үлэлээбит.
Кирилл Бычков Саха сиригэр туох сыһыаннааҕый диир буоллахха, кини 2014 с. Дьокуускайга кытаанах бөҕү хомуйар, иккиһин оҥорон таһаарар технопаарка тутар санаалаах кэлэ сылдьыбыта. РФ бэрэсидьиэнигэр бастайааннай бэрэстэбиитэлистибэни, Дьокуускай куоран мэрын Айсен Николаевы кытары дуогабар түһэрсибитэ.
Оччолорго Кирилл Евгеньевич “Black Swan Capital Partners Limited” управляющай партнерунан үлэлии олороро. Бу дуогабары түһэрсиигэ кини «Якутскэкосети» хампаанньа акционердарын бэрэстэбиитэлин быһыытынан сылдьыбыта. Оттон былырыын Москва уобалаһын сайдыытын корпорациятын дириэктэринэн үлэлии олорон, Саха сирин сайдыытын корпорациятын салайааччытын Петр Алексеевы кытары бииргэ үлэлэһэргэ илии баттаспыта.
Салгыы ханнык миниистирдэр Ил Түмэн сөбүлэҥин ылыахтаахтарын көрүөххэ. Бастатан туран, экономика уонна үп миниистирдэрэ сөбүлэҥи ааһыахтаахтар. Бу сайын экономика миниистирин э.т. Майя Данилова анаммыта. Кини бу иннинэ миниистири бастакы солбуйааччынан үлэлии сылдьыбыта. Үп миниистиринэн Валерий Жондоров оннугар хаалла. Кини бу дуоһунаска 2012 с. үлэлиир.
Тыа хаһаайыстыбатын уонна айылҕа харыстабылын миниистирдэрэ Александр Атласов, Сахамин Афанасьев дьокутааттар сөбүлэҥнэрин ыллахтарына, эмиэ оннуларыгар хаалыахтара. Сахамин Миланович бу министиэристибэни 2014 с. салайар. Оттон Александр Павлович бу дуоһунаска быйыл саас кулун тутарга анаммыта. Кини бу иннинэ Нам улууһун баһылыгынан үлэлии олорбута.
Айсен Николаев бу сайын Тас сибээс уонна норуоттар дьыалаларыгар диэн саҥа министиэристибэ тэрийбитэ. Миниистиринэн Гаврил Кириллины көрөрүн туһунан эттэ. Гаврил Витальевич миниистир э.т. бу сайын анаммыта. Кини бу иннинэ Дьокуускай куорат инвестиционнай сайдыытын департаменын салайааччытынан үлэлии олорбута.
Бу үөһээ ааттаммыт кандидатуралар Ил Түмэн алтынньы 18-19 күннэригэр буолуохтаах иккис уочараттаах пленарнай мунньахтарыгар көрүллүөхтэрэ.
Аграфена КУЗЬМИНА, “Саха сирэ” хаһыат, edersaas.ru