Виталий Мутко: “Спорт национальнай көрүҥнэрэ салгыы сайдыахтара диэн эрэллээхпин”
Атырдьах ыйын 11 – 16 күннэригэр Ульяновскай уобаласка Көҥүл судаарыстыбалар түмсүүлэригэр (КСТ) киирэр дойдулар национальнай спорт көрүҥнэрин, оонньууларын бастакы бэстибээлэ ыытыллар.
Бэстибээл сүрүн күрэхтэһиилэрин бырагырааматыгар самбоны, ханаат тардыһыытын, “городкины”, лаптаны, мээчиктээх хоккейы (мини), киирэ спордун, саахыматы, оҕунан ытыыны, курдаһан тустууну сэргэ сахалар мас тардыһыыбыт киллэрилиннэ. Онон КСТ киирэр дойдулар итиэннэ Арассыыйа регионнарыттан кэлэр мадьынылар саха төрүт оонньуутугар эмиэ күрэс былдьаһыахтара. Ону тэҥэ хотугу многобрьены, сахалыы ыстаныылары, хапсаҕайы кытта билсиэхтэрэ.
Спорт, туризм уонна ыччат бэлиитикэтин боппуруостарыгар РФ бырабыыталыстыбатын бэрэссэдээтэлин солбуйааччы Виталий Мутко инньэ 2014 сыллаахха Владимир Путин көҕүлээһининэн спорт Олимпийскай оонньуулар бырагыраамаларыгар киллэриллэ илик итиэннэ национальнай көрүҥнэригэр Бүттүүн Арассыыйатааҕы бастакы бэстибээл Ульяновскайга ыытыллыбытын ахтан туран, быйылгыттан таһыма үрдээн, Көҥүл судаарыстыбалар түмсүүлэрин дойдулара кыттыылаах эмиэ ыалдьытымсах Ульяновскай уобаласка буоларын сүргэтэ көтөҕүллэн туран бэлиэтээтэ.
—Арассыыйа спорка баай үгэстэрдээҕинэн биллэр. Спорт үгүс көрүҥэ биһиги дойдубутугар үөдүйбүтэ уонна ситиһиилээхик сайдар. Олортон үгүстэригэр, холобура, мээчиктээх хоккейга курдук, биһиги спортсменнарбыт баһылыыллар-көһүлүүллэр. Оттон киирэ спордунан, “городкинан”, лаптанан, самбонан мөлүйүөнүнэн киһи дьарыктанар. Инникитин спорт бу көрүҥнэрэ салгыы сайдыахтара диэн эрэллээхпин”, — диэтэ Виталий Мутко.
Роман ПОПОВ, “Саха сирэ” хаһыат, edersaas.ru