Вируһу утары охсуһар эмкэ сыана үрдээтэҕинэ — тута биллэриҥ!...
Олох-дьаһах

Вируһу утары охсуһар эмкэ сыана үрдээтэҕинэ — тута биллэриҥ!

Дуоллар ыараан, омук сириттэн киирэр эмпит сыаната эмиэ үрдээтэ. Киһи доруобуйатын бөҕөргөтөр аҥаардас битэмиин, БАД  1500-3500 солкуобай.  Аптека аайы сыана тус-туһунан. Ыксал тирээтэҕинэ, кыра хамнастаах уонна биэнсийэлээх дьон эмтэрин да кыайан ылыа суохтар. Судаарыстыба эмп-томп сыаната үүнэ-тэһиинэ суох үрдүүрүн тохтотор кыахтаах дуо?

«Киһиэхэ наадалаах уонна суолталаах эмп ахсааныгар вируһу утары охсуһар эмтэр эмиэ киирэллэр. Федеральнай былаас уорганнара омук сириттэн киирбит эмкэ кытта сыананы кыраҕатык хонтуруоллууллар. Өскөтүн аптекаҕа ити эмкэ сыана үрдэтиллибитин биллэххитинэ, СӨ Сыана бэлиитикэтин судаарыстыбаннай кэмитиэтигэр, эбэтэр Росздравнадзорга биллэриҥ», — диэн этэр СӨ Сыана бэлиитикэтин судаарыстыбаннай кэмитиэтин бэрэссэдээтэлэ Антонина Винокурова.

Үҥсүү суруккутун кумааҕыга бэчээттээн, Ленин проспега, 28 аадырыһыгар киирэр аан таһыгар буочта дьааһыгар хаалларыаххытын, эбэтэр rek@sakha.gov.ru электроннай көрүҥүнэн ыытыаххытын сөп. Сурук суруйуон баҕарбат дьон СӨ Сыана бэлиитикэтин судаарыстыбаннай кэмитиэтигэр (4112) 508-026 (өрөбүлэ суох сарсыарда  08.00 — 17.00 чааска диэри) эрийэн биллэрэргитин күүтэллэр.

Марианна Тыртыкова, «Саха сирэ», edersaas.ru

Хаартыска gazeta-n1.ru

 

 

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

12 − два =