Виктор Михайлов: Россия бэрэсидьиэнин этиититтэн тосту уларыйыылары кэтэһэбин
Философскай наука дуоктара уонна Хотугулуу-Илиҥҥи федеральнай университет профессора Виктор Михайлов дойду бэрэсидьиэнин Федеральнай Мунньахха сыл аайы оҥорор Анал этиититтэн тугу күүтэрин туһунан санаатын үллэһиннэ. Кини судаарыстыба баһылыгын тыл этиититтэн туох эрэ тосту уларыйыылары күүтэрбит буолуо диэн сабаҕалыыр.
“Быйыл бэрэсидьиэн Анал этиитэ быыбар иннинээҕи күөн былдьаһыыны кытта сөп түбэстэ уонна бу туһаайыыны ахсынньы ый оннугар кулун тутар 1 күнүгэр тэрийдилэр. Кэм-кэрдии бэйэтин уларытыыларын киллэр. Анал этии чэрчитинэн быыбар иннинээҕи түгэннэр уонна былааннар этиллэллэрэ күүтүллэр. Мин санаабар, Владимир Путин бэйэтин утарылаһааччылаын быыбар иннинээҕи эрэннэриилэриттэн ханнык эмэ түгэннэри болҕомтоҕо ылыаҕа, тоҕо диэтэххэ, күрэстэһээччилэрин бырагыраамаларын сүрүн пууннара биллэллэр”, — диэн бэлиэтээтэ СИА-ны кытта кэпсэтии кэмигэр Виктор Михайлов.
“Иккиһинэн, норуот ханнык эрэ чопчу дьаһаллары күүтэр. Путин урут даҕаны быыбар буолар сылларыгар Федеральнай Мунньах иннигэр санаатын этэрэ. Бу хайы үйэ төрдүс сылын ыытыллар, онон олохсуйбут эрэннэриилэри дьон соччо ылыныа суоҕа, ол иһин дойдубут лидерин тылын-өһүн олус сэргээн истиэҕим. Хайдаҕын да иһин, буолаары турар болдьох кини бэрэсидьиэнниир карьератыгар бүтэһигин буолуоҕа”, — диэн агентство сэһэргэһээччитэ салгыы эттэ.
Үсүһүнэн, эксперт санаатынан, бэрэсидьиэн бэйэтин хамаандатын саҥардар туһунан тугу эмэ этиэн сөп. “Мин кини бырабыыталыстыбаҕа буолуохтаах туох эмэ уларыйыылары этэригэр баҕарабын. Киниэхэ тус бэйэтигэр тугу да тутуһарым суох, оттон миниистирдэр кабинеттарыгар баар. Онон ханнык эрэ тосту уларыйыылар буолаллара наада, икки болдьоххо Путин туруктаах буолуу туһунан эппитэ уонна сайдыы диэки барыахтаахпыт. Аан дойду биһиги кириисис балаһыанньатыттан тахсыбыппытын билинэр, инники диэки хамсанарбытыгар сөптөөх идеялар күүтүллэллэр. Бэйэм кэтэһиилэрбэр соҕотох буолбатаҕым эрэбил. Владимир Владимирович Россия уопсастыбатын хамсатыан наада”, — түмүктээтэ санаатын Виктор Михайлов.
Судаарыстыба баһылыга сылга биирдэ Федеральнай Мунньахха дойду балаһыанньатын уонна ис уонна тас бэлиитикэ сүрүн хайысхаларын тустарынан Анал этии оҥорор. Бу бырагыраама хайысхалаах бэлиитикэ- быраап докумуона Россия сайдыытын стратегическай хайысхаларын чугастааҕы кэмҥэ көрөр кыаҕы биэрэр. Анал этиигэ бэлиитикэ, экэниэмикэ, идеология балаһыанньалара таарыйыллар, ону сэргэ парламент икки палататын сокуону оҥорууга этиилэрэ.
edersaas.ru